Zothlifim Logo
Loading ...
Mizoram NewsMizoram News

Aizawl District huam chhung khaw 13 leh Kolasib District huam chhung khaw pahniha Village Council bye-election chu thlaleh chhunga neih turin Mizoram State Election Commission-in a tinzawn.

Hemi chungchang ngaihtuah hi ngaihtuahin nimin khan Mizoram State Election Commissioner Pu C.Ropianga hovin a pisaah sawrkar mi pawimawhte an ṭhukhawm a. Aizawl District huam chhunga khaw 13 – Zokhawthiang, North Tinghmun, Mauchar, Zohmun, Palsang, Sakawrdai, Khawpuar, Vaitin, North Khawdungsei, Thingsat, New Vervek, Damdiai leh Lungsum bakah Kolasib District a khaw pahnih – Saipum leh Saiphai-ah te hian dan leh thupek lama harsatna avangin February ni 23 khan hmun dang rualin Village Council inthlan buatsaih theih a ni lova. Hemi hnu hian Bye-election buatsaih turin SEC chuan hma a la leh a, inthlan chuh tum hming pe lut an awm tak loh avangin inthlanna neih theih a ni ta chuang lova, sawrkar chuan VC term dinglai hun a pawt sei ta a ni.

Hun pawhsei hi August ni 25 khian a tawp dawn tak avangin Bye-Election hi buatsaih a ṭul ta a, State Election Commissioner chuan khaw 15 a VC Bye-Election chu thlalehah neih tum a nih thu meeting-ah hian a sawi a ni.

Nimin meeting-ah hian he inthlan atana electoral roll endik hna, Special Summary Revision neih dan tur ruahmanna siam a ni a. Draft Publication of Electoral Roll chu karleh Thawhṭanni khian tarchhuah a ni anga, ni 27-ah hma in sawisel duh nei te tan sawiselna hun hawn a ni ang a, ni 28 leh ni 3 inkarah dilna leh sawiselna chu chinfel a ni ang a, ni 4 leh ni 6 chhungin Electoral Roll chinfel a ni anga, final roll chu ni 8 ah tarchhuah a ni ang.