Mizoram Building and Other Constrcution Workers Welfare Board hnuaia kuthnathawktute hamthatna chi khat an fate sikul kalna tur ṭanpuina chu nimin khan Aizawlah sem chhunzawm a ni a, Aizawl khaw pawnah pawh sem a ni ang.
Thulakna tarlan danin he hamthatna hi tunkar thawhlehni aṭanga nimin thleng khan Aizawl khawpui a kuthnathawktu chhungkua tan sem chhuah ani a, `36,06,250 sem chhuah tawh a ni.
He hamṭhatna hi nitin inhlawhfa fa 2 chin zelah naupang pakhat tan `1,500 zel a ni a, Aizawlah hian chhungkaw 2,200 vel hnena pek chhuah tur awm anga chhut a ni.
He hamṭhatna hi kum 2012-13 School session chhung atana a ni a, nikum lam khan cheng nuai 85 pek chhuah tawh niin, tun tumah hian Aizawl huam chhungah bik tan cheng nuai 53 pek chhuah tura ngaih a ni.
Mizoram Building and Other Constrcution Workers Welfare Board hnuaiah hian kuthnathawk inziaklut mi 12,633 an awm tawh a, dilna 27,446 a awm mek a ni. Tun thlengin kuthnthawk an hnathawhna hmuna thi mi 2 an awm tawh a, pakhat chu he scheme siam danglam hma a Saituala thi niin `50,000/- pek a ni a, midang Khawzawl a boral chu scheme siamṭhat hnu ami niin `2,00,000/- pek a ni tawh a, sum an pekchhuah hi Department hrang hrang leh Company te aṭangin chhiah lakkhawm a ni a, tun dinhmunah cheng vaibelchhe 13.06 chuang a tlingkhawm tawh a ni.
Mizoram Building and Other Constrcution Workers Welfare Board hnuaiah hian `145/- chawiin kuthnathawktu dik tak te chu inziahluh theih a ni a, hemi hnuaiah hian mahni hnathawhna hmuna thiten cheng nuai 2 an dawng thei a, hnathawhna hmun a nih lovin cheng nuai 1 pek a ni ang a, kum 3 member chin tan nupui pasal neihnaah `3,000/- thleng ṭanpuina a awm a, damloh thulhah damdawiin a dah a nihin ni 5 chhung `500/- nitin pek ṭhin a ni a, ni 6-na aṭangin nitin `300/- zelin `10,000/- pel lo thleng a pek theih a ni. Heng bakah hian member fa te chuan pawl 12 exam-ah Distrtct a mark hmu sang ber a nih chuan `10,000/- pek theih a ni a, member fa 2 thleng pawl 10 hnuaiah `2,000/- a ṭanpui an nih bakah Professional Course-Engineer, Doctor leh a dangte zir duh tan `10,000/- pek theih a ni bawk.