Zothlifim Logo
Loading ...
Pic:Madawnga Khiangte via facebook.com

Tunhnaia Laipuitlang leh Ramhlun Venglaia leimin avanga thi mi 17 te sunna chu nimin tlai khan chhiatna thlenna hmunah neih a ni.

Laipuitlang Relief Committee hnuaia Organising Committee huaihawt sunna inkhawm ah hian he chhiatna a thi mi 17 te hming chhiar chhuah a nih hnuah ngawi renga dingin thlahna neih a ni.

Pic:Madawnga Khiangte via facebook.com
Pic:Madawnga Khiangte via facebook.com

He sunna inkhawm Organising Committee Chairman Pu Lalbiakmawia Khiangte kaihhruai ah hian Chief Minister Pu Lal Thanhawla chuan, he chhiatna a thi te chu sawrkar chuan a tawrhpui takzet tih a sawi a, he chhiatna thlen velah sawrkar chuan a tih theih ang ang ti nghalin, chhiatna thlenna hmunah Minister, MLA ten thutchilhin sawrkar thuneitu pawimawh te chuan an tih theih ang an ti zing zung tih a sawi a, he vanduaina hi thil hreawm ni mahse Pathianin thu a sawi duhna avanga thil thleng anih theih thu leh Pathian kohna anga ngaia a lam hnaih nana hman thiam a tul a ti.

He chhiatna thlen laia mipui te chetlak dan leh a tul anga an inthununna chu tha a tih thu sawiin Mizo nih a ti nuam hle ani a ti a, he chhiatna atang hian chhiatna thlen thulha inzir belhna tur leh hmalak dan tur tam tak ngaihtuah chhuah zel a tul thu a tarlang tih a sawi bawk. Sunna inkhawm ah hian Central YMA President Pu T Sangkunga chuan he chhiatna atana sum hmuchchhuah tawh chu `82,06,000/- a ni tawh tih a sawi a, Laipuitlang leh Ramhlun Venglai Local Council President ten thu an sawi bawk a ni.

He inkhawmah hian Prof Laltluangliana thuziak “Kan van a duai chuang em mi le?” tih chu chham chhuah a nih hnuah 1st Bn MAP a Deugle Team ten tawtawrawt hamin an thlah a ni.