LK Advani banna thehluh pawmpui lo

Bharatiya Janata Party (BJP) Parliamentary Board chuan an party hruaitu hlun L.K. Advani-a’n party-a a nihna hrang hrang aṭanga a banna a thehluh chu an pawmpui lo.

An party President Raj Nath Singh-a chenna ina party meeting hmanhmawh nimin tlaia an neihah Pu LK Advani-a’n an party Parliamentary Board, National Executive leh Election Committee-a a nihnate aṭanga a banna a thehluh chu BJP Parliamentary Board chuan a pawmpui lova, meeting neih zawhah hemi thu hi BJP President Raj Nath Singh-a chuan thuthar theh darhtute hrilhin an party chuan tunhma zawng aiin Pu Advani-a kaihhruaina an mawhmawh zual a ni, a ti.  Meeting neih zawh veleh hian BJP hruaitu Sushma Swaraj, Arun Jaitley, Anand Kumar leh Ravi Shankar Prasad te chuan Pu Advani-a hi hmuin an party Parliamentary Board thutlukna hi an hrilh nghal a ni.

Pu Advani hian nakuma ram chhung inthlanpui neih tur atana an party campaign committee Chairman atana Gujarat Chief Minister Narendra Modi-a ruat a nih chungchangah an party chuan a ngaihdan an bengkhawnsak lo nia sawiin a banna nimin khan party President Rajnath Singh-a hnenah a banna a thehlut a, hemi chungchangah hian JDU President Sharad Yadav-a chuan he thil hi ngaihthah chi a nih loh avangin an party chuan an sawiho tur thu a sawi a, Tamil Nadu Chief Minister, AIADMK hruaitu Jayalalitha-i chuan hei hi BJP party bil buaina a ni, a ti a. Congress Gen. Secy. Janardhan Dwivedi-a chuan BJP-in campaign Chairman atana Narendra Modi-a an ruat chu BJP tlakchhiat bul inṭanna tur a ni, a ti ve thung.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram