Mizoram Police te hman tur silai ṭha, Colt M4 Carbine zahnih, a hmanraw dang ken tel leh a spare parts, Mizoram sawrkarin Colt Defence LLC, USA aṭanga a lei chuan Aizawl a rawn thleng tawh.
Hetiang hi a tiatpui zingah a aia ṭha a awm chuang lova, khawvela sipai ṭha bera an sawi US Marines bakah US Navy Seals te pawhin an hman mek a ni a. India ramah Mizoram Police leh Mumbai chauhin an la nei a, Muimbai Police-in an neih theih chhan hi terrorist hovin Taj Hotel an beih vangah khan ngaih an nih laiin Mizoram Police-in an neih theih chan hi Mizoram sawrkar leh police hotute hmalakna vang niin thulakna chuan a tarlang.
He silai lei tur hian MPF Scheme hnuaiah thiam taka project siam a ni a, sawrkar laipui aṭanga pawisa hmuh a nih hnuin Ministry of Home Affairs-in tehna chihrang hrang hmanga enchhin hmasa tura a tih angin a siamtu company sensoin Mizoramah enchhinna neih hmasak a ni a, enchhinna report (Trial & Evaluation Resport) hi sawrkar laipui, Ministry of Home Affairs-ah thehluh a ni a, Ministry of Home Affairs in a pawm hnuah Mizoram sawr-kar hnenah lei phalna a pe a, Direectorate General of Foreign Trade aṭanga Import Licence hmuh a nih hnuah USA aṭanga direct-a lei a ni ta a ni.