MNF Party chuan Mamit District chhung, Rajiv Nagar khuaa hel pawl NLFT nia hriatte’n Gautam Construction LTD hnuaia border fencing hnathawk, mi 3 an ru bo chu pawi an tiin a rubo tute rang taka man chhuaka, an mi rukbote him taka chhuah leh nghal tur leh rukbote rang taka an lo chhuah theih nana chak taka tan la turin sorkar an phut thu an tarlang .
MNF chuan Congress sorkar hnuaia hel hoin sum tuak nana Mizoram chhungah Mizote leh hnamdang hnathawkte an ru bo reng mai nia sawiin thla hmasa lawkah mi panga lai rukbo niin, Home Minsietr R. Lalzirliana chuan ‘Silai mu-a thleng mai a duh thu,’ uang takin a sawi a. Khami tuma rubotu, misualte tho kha tuna rubo tute hi niin an lang a. Chuvangin, Home Minister R. Lalzirliana cho chhuah leh, a ruka engemaw zawngchhang thlak tak, puanhnuai thil a awm vang ni theiin, MNF chuan an ring ani tih an tarlang.
Law & Order-ah Congress sorkar chu fail lailet der nia sawiin High High Court Order pawh zah zo lo khawpa mihring thin urna inleih baw mai tur hre rengin, sorkar chu a kuangkuah tlat a. Home Minister-in a tih tur a tiloin Saikhumphai bawk hal hun hi a nghak chhuak ta mai nia an ngaih thu an tarlang a ni.
Mizoram hmun hrang hrangah Zu leh damdawi ruihhlo tawlhruk leh man a hluar hle a, Sorkar tan mualphona nasa tak tlingah an ngaih thu an tarlang a. Assam Rifles Mandir chhunga Bomb ti puaktute chu zawn chhuah kawngah Congress sorkar a thatho loh lutuk avangin, man chhuah leh rinhlelh an la nei miah lo nia sawiin mak an tih thute LADC sum cheng nuai 47.95 zet bo chu sorkar inthlahdah vang a ni a, Hmanni lawk ah Zawlnuam BDO Office atangin cheng nuai 200 dawn sorkar inthlahdah vangin a bo tawh a, heng pawisaten hi bank-a dah lova venghimtu pawh awm lo, Office-a dah ringawt hi thil fello tak, sorkar inenkawlna nep lutuk vang a ni, an ti bawk.