MNF President leh British High Commissioner inkâwm

Mizoram News

Aizawla cham mek, British High Commissioner, Sir James David Bevan chuan nimin zing khan MNF president Pu Zoramthanga chu a chenna inah a kawm.

Sir James Devan-a’n MNF chu sorkar leh ta se eng angin nge Mizoram kaihhruai an tum tih a zawhna chhangin Pu Zoramthanga chuan, “Sawrkarna an chan leh chuan, Mizoram chu ram chhunga per capita income sâng ber zingah an hlankai ngei a beisei,” tih a sawi a, Mizoram Development Programme an duan hrang hrangte a hrilhfiah bakah, zu leh ruihhloin a tihbuaite enkawlna hmun lian tham, State dang pawhin an entawntlak din ngei an tum thu a sawi bawk.

Pu Zoramthanga chuan hnam sipaite’n an thinlung taka Mizoram an hmangaih thu Pu Devan chu hrilhin, “Mizoram tan huaisen leh rinawm takin an do a, remna leh muanna siam hnuah erawh chuan Mizoram an hmangaih vang bawkin rinawm takin an awm zui a, tumah ramhnuaia chhuak leh awm lo khawpin an hmangaih Mizoram tan an rinawm zui ta a ni,” a ti a, Mizorama remna leh muanna awm theih chhan chu political party hrang hrang te, kohhran leh tlawmngai pawl hrang hrangte inpekna leh thawhrimna rah a nih thu a sawi bawk.

High Commissioner chuan Pu Zoramthanga chu Mizoram a lo kaihhruai tawhnaah chhuanawm a tih thu hrilhin, kha chen ramhnuai a an awm hnua tualchhung sawrkar hlawhtling leh entawtlak tak a siam leh thei chu fakawm a tih thu a hrilh a, MNF president chu kum 20 chhung India sawrkar nena indo tawh an ni chunga remna leh muanna boruak hlawhtling taka humhim zuitu an ni thei chu fakawm a tih thu a hrilh bawk.