Mizoram Govt (Lumpsum) Aided School Association chuan an harsatna sawrkarin a sutkian sak theih loh avangin naktuk aṭangin tiam chin awm lovin an zirna in te chu an khar a ngai dawn tih an sawi.
Nimin khan thuthar lakhawmtute kawmin, an pawl President Pu C.Lalngaihzuala chuan khawtlangin an mamawh vanga an din Lumpsump Aided Sikul 26 (Middle School 4, High School 13 leh Higher Secondary School 9) ah te tun dinhmunah zirtirtu 109 leh zirlai 1132 an awm tih a sawi a, heng sikula thawktute chuan hun rei tak harsatna paltlang-in, hlawh beitham te te la a an tawrh hnuin, sawrkarin a ngaih-sak zui si lo a, hei vang hian sikul te hi khar a ngai ta a ni a ti.
An pawl chuan Adhoc Aided a hmalakna nasa tak an beih hnuah a tira beisei sang tak nena an thlir chu sum a awm lo tia chhan an ni tih sawiin, hei hi an ringhlel lo chungin sawrkar hnena hlangkai tura bul an ṭan tirh laiin sum a awm lo tih an hriat avangin sawrkar kumthar a Budget tharah telh turin an ngen zawk tih an sawi a, Education Minister thurawn angin Lumpsum Aided sikul 78 zingah khawtlang din liau liau 26 te thlangchhuakin Minister format siam ngei ah report an thehlut tih an sawi a ni.
Sikul khar tur chungchang-ah hian Managing Board aiawh te pawhin theihtawp an chhuah thu an sawi a, amaherawhchu an dinhmun a harsat chhoh tak em avangin an dinhmun chu zoram mipuite hriata mualphopui mai ngam a ngai ta niin an sawi a, school khar hial a ngaih tur thu an sawi.