Zothlifim Logo
Loading ...

Mizoram State Olympic Association chuan nimin khan Chief Minister Office cabinet room-ah Executive Meeting vawi 7-na an President Pu Lal Thanhawla, Chief Minister hoin meeting an neiah chuan, Association hi nikum 2012 atang khan mi in luahin office hrang angin an lo kal tawh a. Hun lokal zel tur thlirin mahni puala building neih ve ngei chu thil ṭulah ngaiin hemi atan hian sawrkarah Aizawl khawpui hmun laili Assam Rifles chhuahsan turah ram dil nise tihte an rel.

Meeting-ah hian thurel tur agenda engemawzah an chhawpchhuah zingah sawrkar-in programme pawimawh tak alo hawn tawh, ‘Olympic Vision 2016’ tia vuah, kum 2016 a Brazil khawpui Rio de Janeiro a Olympic neih tura Mizo ṭhalaite, sports discipline 9 thlan chhuah te zinga a engemaw bera an tel ve ngei theihna tura sawrkar-in hma a lak ṭan mek chu Olympic Association a nih anga a mawhphurtu leh hma latu tur ni vea inngaihnaah engtinnge hma an lak ve ang tih chu uluk taka sawihoin, College hrang hrangah kal a lecture te pek nise tih an rel a. Olympic Day Run kumtin June ni 23 a neih ṭhin chu kuminah Pathianni (Sunday) a nih avangin June ni 22 Inrinni ah hmang turin Assam Rifles lammual chu dil nise tih an rel bawk a. Aizawla lo buatsaih tawh Sports Medicine Seminar chu District hrang hrangah buatsaih ve nise tih an sawiho bawk a.

Hengte bakah hian nakum 2014 February thla a National Games vawi 35-na Kerela state a neih turah Mizoram state aiawhte hruaitu tur Chef De Mission pakhat leh Dy Chef De Mission pahnih a hma thei ang bera ruat tura MSOA tih an nih angin Chef De Mission atan MSOA Secretary General nilai Pu Zoliana Royte chu meeting chuan a ruat a. Dy Chef De Mission turte chu Pu Zoliana Royte kutah an dah a ni.