Politics lalna it-ah PRISM puh

Congress Party-in PRISM chu Politic lalna it avanga mi hmingṭha te tihhmingchhiat tum nan eirukna dotu pawl anga awm ni a an ngaih thu an sawi.

Inrinni-a Aizawl Press Club-a thuthar thehdarhtute an kawmnaah MPCC Media Cell chuan he thu hi an sawi a, Media Cell Chairman Pu C.Lalruata chuan Minister leh MLA-te dinhmun dik tak hre loa thu belhchian dawllo leh rin dan ringawta FIR thehlutah PRISM chu a puh a ni.

PRISM hian thlahlui May Ni 15 khan Anti Corruption Bureau-ah Chief Minister leh MLA thenkhat lakah, mahni sum lakluh phu lova thil neia puhin FIR an thehlut a, hemi chungchang hi MPCC chuan an chhanglet a ni.

Press Conference an neih hma hian eirua rinhlelh te insak, hlawh nena inmil lo nia ngaih te chu Chanchinbumite leh TV Thlalatute an lo enpui tawh bawk a ni.

Thuthar thehdarhtute an kawmnaah hian MPCC Media Cell Secretary Pu Lalrozara chuan Laipuitlang chhiatna chungchangah Chief Minister Pu Lal Thanhawla leh a nau Pu Lal Thanzara te mawhphurtuah puha MNF Party-in bang tura an phut chungchang chu sawifiah lehzual an phut tih a sawi a, Chief Minister te mawhphura an hriat dan chu sawi chiang se an tih thu leh rinthua Sorkar an puhmawh ringawt chu Politics rilru ngiau nger vang maia an ngaih thu an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram