Ramri-ah Assam sawrkarin hma a lak chak em avangin, Mizoram sawrkarin hma chak taka a lak ve thuai loh chuan Mizoram ram a chân hret hret zel dawn niin a lang tih a hmuna enfiahtu AMFU General Secretary, Zion Lalremruata chuan a sawi.
AMFU General Secretary leh Vairengte lama AMFU hruaitute chuan Vairengte thlanga Assam leh Mizoram inrina bawr vel hi enfiahin, tunah hian Assam lamin hma an la nasa hle a, PMGSY hmangin kawng an lai a, an metal nghal zel bawk niin a sawi a. Mautui lui bula K Hlimlawma, Vairengte Kawng-thar Veng ami leilet phai bul thlengin Assam hian kawng siamin black top turin hma an la mek a ni tiin, “An hmalak dan atanga en chuan Assam sawrkar hian ramri hi ngaihpawimawh (priority)-ah a dah tawp niin a lang,” a ti bawk.
AMFU hruaitu chuan ramri hrula leilet neia eizawng, loneitute harsatna tawhte an fiah nghal tih a sawi a. Thla te la in, documents engemawzat nen sawrkar hotute, Chief Minister leh a concern minister-ah te an thlen dawn tih sawiin, tun dinhmunah ramri chungchang-ah boruak tharlam a awm lo a, lo awm leh ta sela chuan Assam lam chu a pawr zawkah an ṭang leh ngeiin a rinawm, a ti.
Mizoram sawrkarin ramri venhim leh humhalh kawnga hma a lakna chu beitham an tih thu sawiin, AMFU chuan ramri a ngaihpawimawh avangin Vairengte chauh ni lovin, kum 2008 ah Tlabung lama Bangladesh nena inrina (International Border) pawh an tlawh tawh thu leh thil fel lo tam tak an hmuh chhuahte, ziakin khatih laia sawrkar (MNF Ministry) ah pawh an thehluh tih a sawi a. Vairengte NGO Co-ordination ten Boundary Department din nise tia sawrkara thlen an tum chu AMFU pawhin a thlawp tlat thu sawi bawk.
Hetihlai hian, kum 1981 hmalam chhiarpui (census)-ah Mizoram zau zawng Sq.Km. 20,187 ti hlira chhinchhiah ni ṭhin chu, 1981 chhiarpui aṭangin Sq.Km.20,181 tia record a ni a, 1981 aṭangin Mizoram chu Sq.Km.6 laiin a zim tih Mizorama census buaipuitute chuan an sawi a ni.