Ningani-a MNF Gen. Headquarters Publicity Board-in Press Conference an koh-a Tuivawl bialtu MLA Pu RL Pianmawia’n seal lem hmanga cheng nuai 1 la chhuak a, he sum hi a fanghmano ei ta mai anga ngaihtheih a sawi chu thudiklo niin North Serzawl Branch YMA hruaitute chuan an sawi.
Inrinnia Aizawla chan-chinbumite an kawmnaah North Serzawl YMA hruaitute chuan kumin February thlaa an khua-in Chalfilh Group YMA Conference an thlen avang khan an sum mamawhna te bialtu MLA hnenah an thlen tih an sawi a. MLA Pu RL Pianmawia hian an inhlawhna tur lo siamsakin a MLA fund aṭangin cheng nuai 1 chu Middle School panna step siamna tur a buaipui sakin, he hna sanction order hi N.Serzawl VC hminga lo kal a ni tih an sawi a. VC aṭangin YMA leh Congress unit-te chuan Rs.50,000/- ve ve-a insem turin hna an thawk tih an sawi a. YMA branch chuan an sum hmuh tur Rs.50,000/- hi an dawng kim thlapa, hna chu branch hnatlang ten an thawk tih an sawi a ni.
North Serzawl branch YMA President Pu Lalṭha-zuala chuan N.Serzawl YMA-in conference tluang taka an dawn theihna tur atana hma a lo laksakna avanga hetianga hming-chhiatna a tawk chu pawi an tih thu a sawi a ni.