Mizo Students’ Union (MSU) General Headquarters Executive Meeting chuan ni 17.6.2013 (Thawhtanni)-a Mizoram sawrkarin Teachers Eligibility Test (TET) Exam a buatsaih tura dân hman hi duhthusam a nih loh rualin hun rei tak SSA zirtirtua lo thawk tawhte dinhmun a ngaihtuahin âwm an tih thu an sawi.
MSU Executive Meeting hi nimin chhun dar 12 khan neiin, MSU General Executive Member, College SU Leaders leh Hnampual zirlai hruaitute an tel a, MSU Executive Meeting chuan TET Exam chu âwm an tih rualin August ni 23, 2010 hnu lama SSA zirtirtu tana ‘Special Exam’ a nih ang ngeiin MSU chuan he Special Exam zawhah hian a rang thei ang bera MTET kalphung siamṭha leh turin sawrkar a ngen a; tin, tuna SSA zirtirtu, Special TET Exam hmachhawnte aṭanga 50% marks hmu tling lo an awm chuan sawrkarin an hna aṭangin chawlhtir ngei se MSU chuan a duh a, hei bakah hian tuna TET Exam tur hi ‘Special Exam’ a nih ang ngeiin, he Special TET Exam paltlangte tan zirtirtu hna dang lâkah he TET Exam hi rin theih a nih loh nan ruahmanna fel tak siam turin MSU chuan Mizoram sawrkar a phut bawk a ni.
MSU chuan Ni 28.6.2013 chawhma dar 11:00 hian I & PR Conference Hall-ah ‘India hnuaia Mizoram kan luh dan’ tih thupui hmangin Symposium a buatsaih dawn a, sawm bik mi hrang hrangte nen hun lo kal zel tura Mizo thalaite’n kan history diktak kan hriat theih nan he hun hi hlawk leh phuisui taka hman kan tum a ni.
Nimina MSU Executive Meeting chuan Sialhawk leh Hortoki khua aṭanga MSU zawm dilna lo lut chu ngun taka ngaihtuahin, Sialhawk chu Sub-Headquarters pein, Hortoki chu Direct Branch a pe a ni.