Chief Minister Pu Lal Thanhawlachuan tun dinhmunah thla hnih daih pawh thawk chhuak zo lo, cancer ngah ber hnam nih hi a chhuanawm loh a, tan lak hle a ngai a ni, a ti.
He thu hi Samtlang khua in nimina an khaw kum za tlin lawmna a hmanpuinaah he thu hi sawiin Chief Minister chuan, Mizote chu kristian zaa za inti ngam an nih chuan ei leh barah te, sum leh paiah te intodelh tur a ni a, hnam hrisel ber nih tur an ni a ti.
Pathianin NLUP hmangin Mizote chhanchhuah a tum nia sawiin, a hlawhchham chuan Mizote leh sawrkar a mualpho mai lo ang a, ringlotute mit hmuhah Lal Isua hmel a bâl ang tih a hlauhawm tih a sawi a, NLUP chuan khawvel mamawh a funkim a ni tih mithiamte pawhin an hria a, a hlawhtlin chuan a dawngtute an dingchhuak mai niloin, ramngaw a awm leh ang a, lui hnarte a tha leh ang a, sik leh sa a siam thain, Mizoram a siam tha dawn a ni, a ti.
Chief Minister chuan Samtlang khaw mi tam takin ar vulh hna bera an nei chu tha a tihpui rualin, ran vulhte nen inchiahpiah lutuk chu hriselnain a tuar thei a ni tih hre turin khaw mi te chu a chah a. Heng hna atang hian Aizawl khawpui chawmtu tur an la nih theih avangin leh hmasawn zel tur an nih bawk avangin hmathlir thiam tak nei chunga an kal chhoh a duhsak tih a sawi.
Khualzahawm, bialtu MLA Pu K.S.Thanga, Parliamentary Secretary chuan a bial Aizawl South III a khaw 26 awm zingah Samtlang chu khaw taima ber, remhriatna hmang thiam, an khua a len loh chhuta zirna lama hmasawn ber, Aizawl kurtaia chawm thin khua, tunah chuan ar vulh nasa ber khua ni ta hi chanchin chhe zawnga sawi tur awmlo hian kum za an tling hi an lawmpui awm tak zet a ni, a ti a, Pu K.S.Thanga hian kum za tlin hriatrengna souvenir a tlangzarh nghal a ni.
Samtlang hian kum za an tlin lawmna hi niminpiah aṭang khan an hmang tawh a, nizan thleng khan a lawmna an la kalpui zel a ni. Kum za tlin denchhen hian mi 43 in a thlawnin thisen an pe a, a khawnawtin nimin khan ruai an ṭheh a, kum za tlin lawmna atana sum an hmuh zawng zawng chu Rs.3,16,706.00 a ni. Samtlang khuaah hian mihring 800 vel an awm a, chenna in 168 a awm bawk a ni. Kumin 2013 aṭang hian tui thianghlim tlan tur Aizawl Greater Water Supply Scheme Phase II aṭang pek an ni.