Nikum November leh kumin May thla inkar chhung khan damdawi hmansual (overdose) vangin thalai 158 Aizawl Civil Hospital panpui an ni a, chu’ng zinga 16 te chu an thi.
Aizawl Civil Hospital, Casualty department chhinchhiah danin damdawi over dose vanga thi 16 zinga 8 hi mipa an ni a, 8 dang chu hmeichhia an ni. Tun thla-ah pawh hian damdawiin panpui an la awm reng nain OD case hi a tlahniam telh telh a, April leh May thla ah chuan over dose vanga thi an awm tawh lo. Damdawiin dang pan an awm ve tho avangin OD vanga Damdawiin hruai zat leh thi zat hi hei ai hian a tam rin a ni.
Aizawl Civil Hospital emergency department a thawk Dr. Jeremy V.Pachuau sawi dan chuan tunhnaia overdose te hi a tlangpui-in pawisa nei tam lo, ruih duh ve si te an ni a, heng ho hian damdawi man tlawm te te chi 4 chi 5 te ei pawlhin an rui thin a. A tlangpuiin Higher Secondary zirlai, College kal leh lehkha zir tha peih tawhlo te an ni tlangpui a. Heng ho hian Korean film an en atangin vun no/var an duh vangin damdawi thenkhat Pepe an tih maite te hi an ei thin nia hriat a ni. |halaite hian khuh damdawi Respira D leh Grape Juice te an tihpawlh chuan an thin (liver) kha insiam danglamin a hna thawh tur kha a thawk thei lova, an ril leh chuap te khawih chhiain thihna a thlen thei a ni, a ti. Dr. Jeremy chuan ṭhalai ten ruihna atana an hman thenkhat Pepe/Pacitane ang chi te hi upat hnua thluak chak tawhloh vanga khur (parkinson disease) enkawlna damdawi a ni a; a hlauhawm vangin ram changkang ah chuan kum 18 hnuailam hnenah chuan hralh an phal lo a, Mizoram ah erawh chuan damdawi dawr hrang hrangah lei tur a awm hi a mak hle a ni’ a ti bawk.
Thalaite zinga damdawi hmansual a tam chhan pakhat chu Mizoram ah zu khap a nih vang nia an hriat thu Doctor pakhat chuan sawiin Mizo thalaite hian ruih tur hi an duh hrim hrim nia a ngaih thu a sawi a. Proxyvon hmanga inchiu hi Mizoram thalaite zingah bak chuan an awm hriat a ni lova, state dang doctor-te bula sawi pawhin an awihlo hial a ni, a ti.