Mizoram News

Thuawih duh miahlo sawrkarin a hrem hreh dawn lo:HM

Home Minister Pu R.Lalzirliana chuan, Mizoram Police hotute zingah mahni hna thawk tura sipai chhawr ṭhinte chu sawrkarin sim tura a hrilh nawn fo dawn tawh loh thu sawiin, “Thuawi duh miah lote chu sawrkar pawhin a hrem hreh dawn lo tih a sawi.

Nimin khan State Disaster Response Force (SDRF) batch 8-na training kharna hun 5th IR Bn Headquarters, Lungverh-a neih a hmanpuinaah he thu hi sawiin, Home Minister chuan, Police Officer thuawihlo te chu MPS an nih pawhin IPS-a an kaisan theih lohna tura action lak a ṭul ang a ti a. Kum 5 chhungin police-te rilru hnual tawh kan kai harh thar leh a, sawrkar term a tawp dawn hnaih avanga thuawi lohna leh inthlahdahna a awm chuan sawrkar thikthu a chhe hle dawn a ni” a ti bawk.

“Mizoram hi lirnghing na tak kalkawnga awm kan nih avangin chhiatna lian tham lo thleng thei hmachhawn tura lo inralrin hi thil tul tak a ni a. SDRF te ṭangkaizia leh an thiamnate chu tun hnaia Laipuitlang-a leimin avanga chhiat kan tawhah khan a hmuh theih a ni” a ti a. Mizoram Police battalion tinah SDRF 200-300 tal awm se a duh thu a sawi bawk.

Khualzahawm DM&R Minister Pu Nihar Kanti Chakma pawhin thusawiin, chhiatna lo thlen hun leh ni tur chu hriat lawk theih a nih loh thu sawiin, “Disaster hian ram hmasawnna a tichhiain, a tithuanawp thei a, in leh lo bakah nunna tam tak chan theihna a nih bawk avangin a pumpelh tura ṭanlak leh inralrin chu mitin mawhphurhna a ni” a ti.

Nimin SDRF training chhuakte thlahna inkhawm hi DM&R Principal Secretary Pu PC Lallawmsanga chuan a kaihruai a. He training-ah hian 5th Bn. IR leh Ist Bn. MAP atangin sipai 45 an tel a; National Disaster Response Force (NDRF) 2nd Bn. Kolkata atangin anmahni zirtirtu tur an lo kal a, Mizoram Police atanga Master Trainer 12 ten an pui bawk a ni. Nimina training zo ta te nen hian Mizoram Police hnuaiah SDRF training chhuah mi 424 an awm tawh a ni. Home Minister hian training chhunga titha zual thlanchhuah mi 3 hnenah certificate a sem a; lawman dawngtute chu – 1) Const. Lalramhluna Ist Bn MAP 2) Const. Lalchhuanawma Ist Bn MAP leh 3) Const. H. Lalnunzira, Ist Bn MAP te an ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram