Zothlifim Logo
Loading ...
Mizoram NewsMizoram News

July ni 1, 2013 aṭanga Union Home Secretary hna chelh ṭan tur, tuna OSD, Ministry of Home Affairs ni mek, Pu Anil Goswami chuan nimin khan a vawi khatna atan Mizoram a rawn tlawh.

Nimin chawhma lamah Champhai a tlawh hnuah Aizawl-ah lo kir lehin, chawhnu dar 3 khan Mizoram Chief Secretary leh state sawrkar officials pawimawhte nen Chief Secretary’s Conference Hall, New Secretariat Complex-ah meeting an nei zui nghal a ni.

He meeting pawimawh takah hian Chief Secretary Pi L.Tochhawng chuan Mizoram chu Myanmar leh Bangladesh nen thui tak inri a nih avangin ram himna lamah inthlahdah theih a ni lova, chuvangin Home Ministry aṭanga ‘Security Related Expenditure’ (SRE) an hmuh loh ṭhin chuan venhimna hna a tihbahlah thu a thlen a, hemi chungchang hi Pu Anil Goswami chuan a lo enzui nghal tur thu-in a chhang a ni. OSD Home nena meeting neihah hian thil pawimawh tam tak an sawite zingah 4th & 5th IR Bn. te tana sum mamawh thu te, police thuam chak chungchang te, Tuikuk hruai kir leh ramri hung hna kal mek chungchang te an sawiho a ni.

Pu Anil Goswami chuan Mizoram Governor Pu Vakkom Purushothaman chu a chenna inah a hmu a, nimin tlai khan Mizoram Chief Minister Pu Lal Thanhawla chu a chenna inah a hmu bawk a, Chief Minister nen Mizoram tana thil mamawh tam tak an sawidun a ni. Chief Minister chuan SRE chungchang ngai pawimawh tura chah nawn lehin, police te chenna tur hmun leh in sak a ṭul thu a lo hrilh bawk a ni.