Zothlifim Logo
Loading ...

Tuilianin nasa taka a tihbuai, Uttarakhand-a mitangkhangte chhanchhuah hna chu ruahsur nasa vanga nimin zing lama a khaihlak hlek hnuah hmun sang lama tangkhang, mi 22,000 vel thiarchhuah hna, ngawrh taka thawh chhunzawm a ni leh tawh a, Rudraprayag, Chamoli leh Uttarkashi dist aṭangin sakhaw thila zin mi 70,000 vel chu hmun him lamah thiar chhuah an ni tawh a ni.

uttarakhand_floodHetih lai hian Himalaya tlang pang minin a delh, Kedarnath temple huamchhungah ruang 123 hmuh belh leh a ni a, hengte nen hian he state-a ruahsur nasa avanga vanduaina thlenga thi zat chu mi 680 an tling ta a, thi zat hi 1,000 emaw a la tlin rin a nih thu, state Chief Minister, Vijay Bahuguna-a’n a sawi.

Chhanchhuah hna thawh nan hian State sawrkar engemawzatin helicopter leh bus-te an thawh bakah ṭanpuina sum pek an tum thu an puang a, Tamil Nadu Chief Minister Jayalalitha chuan an state-in Uttarakhand-a tuilian tuarte ṭanpui nan  cheng vaibelchhe 5 a pe dawn tih sawiin thi chhungte hnenah tawrhpuina a hlan a, Assam sawrkar pawhin Uttarakhand sawrkar chu cheng vaibelchhe khat-a a tanpui tur thu a sawi a, hei bakah hian Minister, Parliamentary Secretary leh MLA-ten an thla khat hlawh an thawh dawn bawk a ni.

Arunachal Pradesh Chief Minister, Nabam Tuki pawhin Congress MLA zawng zawngte chu Uttarakhand sawrkar ṭanpuina turin Chief Minister’s Relief Fund-ah an thla khat hlawh thawh vek turin a ngen a, hemi hma lam hian AICC President, Sonia Gandhi chuan Congress MP leh MLA zawng zawngte chu vanduaina tawkte ṭanpuina tur sum thawh khawm turin a lo ngen tawh a ni. Pu Tuki chuan an state-a Congress MLA-te chu an thla khat hlawh, tun thla ni 26 aia tlai lova thehlut turin a ngen a, state mipuite pawh, a thei apiangin Chief Minister’s Relief Fund-ah sumfaiin emaw, cheque emaw demand draft emaw thawh turin a ngen bawk.

President Pranab Mukherjee-a pawhin a thla khat hlawh, Uttarakhand-a tuilian tuarte chhawmdawl nan a thawh dawn a, President hian thla khat-ah Rs.1,50,000/- a hlawh a ni.