Uttarakhand a ruahsur nasa vang a tuilian leh a kaihhnawih thil thleng a thi zat chu 150 tling tawhin, hmun zau tak tuiin a la chim avang leh in leh building tamtak a chhiat avangin thi zat hi an la pun chhoh rin a ni.
Tuilenna hmun tam berah sipai, ITBP leh NDRF te telin pawl hrang hrangin chhanchhuah leh chhawmdawl beihpui thlak an ti ngawrh zual a, sipai te chuan Govindghat-Badrinath Road leh Ghahriya-Hemkund Track a tangkhang, Civil mi te leh Pilgrim te thlawhna a thiar chhuakin, nimin aṭang khan Helicopter 6 hman belh a ni a, a hma in 9 hman a lo ni tawh bawk. Uttarkashi, Chamoli, Tehri, Pithorgarh leh Rudraprayag district ah sipai leh ITBP te’n mipui sang tamtak an thiar chhuak tawh a, Pilgrim leh tualchhung mi thiarchhuah tawh zat chu 23,000 vel an tling tawh a ni.
Supreme Court chuan Uttarakhand a tuilian thutin a dan chah mipui te chhanchhuak a eitur leh tui in tur pe tura theihtawp chhuah turin nimin khan sawrkar laipui leh Uttarakhand sawrkar a hriattir a. Judge 2 te Bench in he thupek hi siamin, tuilian tuar te chhanchhuah hnathawh nan Helicopter tamtawk ruahman turin sawrkar te chu a hriattir ani. Court chuan PIL thehluh a nih avanga he thutlukna hi siamin, tumah thlei bik lova chhanchhuah leh chhawmdawlna hna thawk turin thupek hi a siam a, sawrkar laipui chu chhanchhuah leh chhawmdawlna hnathawh a nih dan report tunthla ni 25 a thehlut turin a hriattir bawk.
PIL ah chuan Gangotri-a tuilian tuar te’n ngaihsak an hlawh lo ni a tarlan a ni.
Prime Minister Dr. Manmohan Singh-a’n tuilian tuar mek Uttarakhand state ṭanpui nan sawrkar laipuiin Cheng Vbch 1,000 a pek tur thu a puang a, heng zinga Cheng vbch 145 chu pek nghal a ni ang, a ti a. Prime Minister’s National Relief Fund aṭangin Uttarakhand tuilian avanga thi chhungte hnenah cheng Nuai 2 ṭheuh pek an ni ang a, hliam tuarte chu `50,000/- ṭheuh pek an ni bawk ang a, hei bakah hian tuilianin an in a tihchhiatsak vek te chu Cheng nuai 1-a ṭanpui an ni ang a, a ṭhen lai a tihchhiatsakte chu `50,000/- pek an ni ang.