Vawk tam tak suattu hri leng a vênna awmlo chi tih finfiah

Thla hnih khat kaltaa Aizawl leh Mizoram hmun hrang hranga vawk ṭhahnem tak suattu hri chu a vênna awm lo chi, Porcine Reproductive and Respiratory Syndrome (PRRS) a ni tih finfiah a ni.

Hemi chungchanga AH and Vety Department thuchhuah tarlan danin, March leh April thlaa vawk hri lêng chu pûl hri pangngai Classical Swine Fever a ni tih fiah a ni a, amaherawhchu a thawhdan enin natna dangin a belh a nih ringin enfiah zui a ni a, Selesih-a College of Vety Science and AH bakah Barapani-a ICAR Research Complex-ah enfiah tura sample thawn niin, sample 60 an thawn zinga 57 chu a positive a, Porcine Reproductive and Respiratory Syndrome a ni tih finfiah a ni ta a ni.

He natna avanga vawk thi zât chiah hi hriat theih a ni lo na in, Mizoram chhunga District tin a tuam a, hetihlai hian khaw ṭhenkhat a lên ve lohna pawh a awm tho tih AH & Vety Department Director Dr LB Sailo chuan a sawi a, hetihlai hian he natna hian ziaawm lam a pan tawh a, tunah chuan vawk te pawh dam leh tawhin an sa ei pawh a hlauhawm tawh lo niin a sawi bawk a ni.

Thenawm ram Myanmar-a leng ṭhin, PRRS natna hi a vênna awm lo, natna chi dang dang thlentu virus insiam danglam thei a nih avangin, a vênna damdawi a awm lova, he virus hi zun, chil, chi leh hnute tuiah te an awm a, ranin an hip luh theih a nih bakah, an thil ei aṭang te, inpawlna aṭang te leh a puiin a note a kaichhawng theih a, ran kah raitir avang pawhin a inkaichhawn theih bawk a, hengte avang hian Myanmar aṭanga vawk lakluh chu hun engemawchen khap a ṭul dawn tih AH & vety Department hotute chuan an sawi a ni.

Myanmar-ah hian he hri hi a lêng reng a, tuna Mizorama lêng pawh hi Myanmar aṭanga vawk lakluh aṭanga kaidarh a nih rin a ni.

He natna khirhkhan tak hian Mizoram a châmchilh hman loh an beisei tih Dr LB Sailo chuan a sawi a, he natna laka invêng turin engtianga chêt lâk dân tur nge tih ngaihtuahin vawiin hian AH & Vety Doctor te an inkokhawm nghal a, hmalak dan tur an rel zui ang.

Tun ṭuma vawk hri lêng vâng khan AH & Vety Department chuan cheng veibelchhe 2 hu hri danna a pe chhuak a ni.