Zothlifim Logo
Loading ...

A thlawna thisen petute ni, World Blood Donors Day chu nmin khan Serchhip-ah pawh hman a ni a, he ni pual inkhawm hi CMO Conference Hall-ah Association for Voluntary Blood Donation, Serchhip Branch buatsaiha neih niin he hunah hian nikum April ni 1 aṭanga kumin March ni 31 inkara pawl hrang hrang leh mimal thisen pe tam te hnenah chawimawina hlan a ni.

Nimina World Blood Donors Day puala CMO Conference Hall-a inkhawm neih hi Dr. Laldawngliana Sailo, CMO Serchhip-in a kaihruai a, Khuallian, Pu RL Chhuanawma, Sub-Hqrs YMA, Serchhip President chuan thusawiin sum leh pai seng lova mite tanpui theihna hlu ber leh awlsam ber chu a thlawna thisen pek hi a ni, a ti a, midang tana a thlawna thisen pek hian midangte lawmna mai a thlen lova, keimahniah lawmna nasa tak min thlen thin a ni tiin he huna kalkhawm te chu a thlawna thisen pek uar deuh deuh tur leh, mahni pek mai duh tawk lova midang te pawh thisen pe tura hrilh hretu leh kawhhmuhttu ni theuh turin a chah a ni.

Nikum April ni 1 atanga kumin March ni 31 inkar chhung khan Serchhip-ah Zirna In, Kohhran leh Tlawmngai Pawl hrang hrang tan Blood Donation Camp vawi 17 neih niin thisen unit 689 pek a ni a, Mimal hnen atangin voluntary a thisen dawn unit 46 awmin Replacement atangin unit 20 pek a ni a, Serchhip Blood Bank-a thisen dawn zawng zawng atanga a thlawn a dawn chu zaa 97.35 (97.35%) a tling a ni.

Nimina Serchhip-a World Blood Donors Day puala inkhawmah hian nikum April ni 1 atanga kumin March ni 31 inkara pawl hrang hrang leh mimal thisen pe tam te hnenah chawimawina hlan an ni a, a thlawn a thisen pek chungchang inzirtirna bakah Report kimchang tak ngaihthlak a ni bawk. 2012 April 1 atanga 2013 March 31 inkar chhung a Serchhip Blood Bank-a thisen pe tam lawmman dawngtute:

Pawl ho:
1. Zirna In lam – NSS Govt. HSS. Serchhip – Unit 87
2. Sakhaw behchhan pawl – Kawnpui Branch KTP – Unit 91
3. NGO leh a dang te – Serchhip Facebook User Group – Unit 76

Mimal:
1. Lalchungnunga Serchhip Bazar veng – Unit 25
2. Samuel Saithuamliana, Lecturer GHSS – Unit 24
3. Lalrinawma Kawlni, Ramthlun Veng – Unit 20