Central YMA in Mizo mipui zawng zawng YMA DAY Vawi 78-na chibai kan buk e.
YMA din champha June 15, 2013 hi sorkarin pisa chawlha a puan remchanga hmanga programme dang siam lova, khua leh vengchhung tana tangkai taka hmang theuh turin pawl leh mitin kan ngen a, a hnuaia tarlan ang hian YMA Branch te leh mimal tinte chu ram leh hnam tan chhenfakawm, mimal tana nun kawng dik inzirtirna hun atan hmang theuh turin kan inbeisei a ni.
1. YMA DAY 2013 thupui atan ‘Ram leh Hnam humhalh’ hman nise, kan khawtlang theuhva a chhe lai leh siamthat ngaite siamtha turin hmalak ni se.
2. YMA hi tanpui ngaite tanpui tura pawl din a nih angin, vengchhunga mi harsa leh chhumchhiate dapchhuak a, a theih ang anga tanpuina hlan nise, YMA Branch tinah chenna in thawmthat ngai leh chhuanchham mai turte dapchhuak a, a theih leh remchan anga chhawmdawl turin kan ngen a, mite harsatna sut kiansakna ni leh mangangte tanpuina ni atan hman ni se.
3. Central YMA-in thisen pek dan tur ruahmanna a lo siam tawh zulzuiin, dam lo mangang tanpui ngaite thisen pe turin YMA Branch tinte leh mimal tinte kan inngen a, YMA General Conference in a lo rel tawh angin, faina leh thianghlimna hi YMA ten kalphunga kan lo neih a nih angin, he ni denchhen hian vengchhung thenfai hnatlang neih ni se.
4. YMA Branch ten a remchan dan a zirin Hospital/Home/Centre-ah te tanpuina thilpek hlan nise. Tin, YMA In, Library, Lungphun, Signboard leh thil dangte tuaithar leh nise, khawlai remchang leh YMA Hall te YMA rawng (flag rawng) a chei uar nise, YMA Flag pawh langsar taka tarlan nise.
5. YMA kum 78-na hi hlim tak leh uar taka hmang turin Mizo mipui duhsakna kan hlan e.
Sd/- VANLALRUATA Sd/- T. SANGKUNGA
General Secretary President,
Central YMA Central YMA