Mizoram News

Bawng vulh lai chân te hnenah bul ṭan lehna tur hlân

Nimin khan AH & Vety Minister Pu NK Chakma chuan AH & Vety. Directorate, Conference Hall-ah natna avanga bawng chân ta Sihphir leh Durtlanga chhungkaw thlanchhuah 20 te hnenah bul an ṭan ṭhat leh theih nan bawng 2 leina tur Rs.90,000 ṭheuh a hlan.

Tanpuina sum hi Rashtriya Krishi Vikash Yojana (RKVY) kaltlanga ruahhman a ni a. He programme hi Dr. L. B. Sailo, Director, AH & Vety Department chuan kaihruai a, AH & Vety Department Secretary Pu T. Sangkunga pawhin a hmanpui a ni.

Pu NK Chakma chuan AH & Vety Department din chhan ber chu ranvulhtute anih thusawiin harsatna an neih te chu Department a thlen zel thin turin a chah a. Bawnghnute tharchhuah kawngah te, sa leh artui intodelhna kawngah te ranvulhtute nen tan ho leh thawhho a pawimawh thusawiin kan tanrual chuan kan hlawhtlin ngei ka beisei a ni, a ti. Bawngvulhtute fuihna leh Department hmalakna hrang hrang hrilhfiahna leh hrilhhriatna a nei bawk a ni.

He programme hmanpuitu dang Pu T.Sangkunga chuan RKVY tanpuina sum chu Mizoram in Budget-a Agriculture leh Allied Sector te tana sum a ruahhman tam vang leh NLUP hlawhtlinna avang te in Central Sawrkar chuan a rawn pek anih thu a sawi. Dr. L. B. Sailo. AH & Vety Director chuan Sawrkar in vanduaina tawk chhungkua te chhawmdawlna a siam chu a vanneihtlak thusawiin Department-in tanpuina dawng te hian bawng an lei ngei em tih an en tur thu a sawi bawk a ni.

RKVY (Rashtriya Krishi Vikash Yojana) hi Sawrkar Laipuiin thlai leh ran vulh atanga tharchhuah tih punna atana a duan a ni a. Hemi kawnga state ti tha te chauh tanpuina sum pek an ni a, he sum hmang hian project hrang hrang siam a kalpui a ni thin a, Mizoramah pawh engemaw zat kalpui mek a ni.

Natna avanga bawngvulhtute eizawnna ber an bawng thi te a theih chin chinah sum awmdan a zirin Department chuan chhawmdawl leh hmathar an lak zel theihna turin RKVY hnuai atangin tanpuina hi buatsaih a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram