Zothlifim Logo
Loading ...

Kum 2013 Mizoram Electoral Roll duan chhin chu nimin khan District hrang hrangah tarchhuah a ni a, State pumah voter 6,80,497 an awm a,  Serchhip District bikah chuan Voter 44,981 an awm.

scpNimin chawhma dar 10 khan Serchhip Bawrhsap Office-ah Serchhip District chhunga Assembly Constituency pathum (Serchhip, Tuikum leh Hrangturzo) a hman tur Draft Electoral Roll siam thar chu tlangzarh a ni a, He hunah hian Recognised Political Party aiawh te, Chanchinbu mi te, Tlawmngai Pawl sawm bik  leh Official pawimawhte an kal khawm a ni.

Draft Electoral Roll a a lan danin kumin January ni 15 a Electoral Roll tlangzarh hnu ah voters 6 thun belh an ni a, Polling Station 10 siam belh (Serchhip-6, Tuikum-4) a ni bawk.

Assembly Constituency pathuma Voters zawng zawngte hian EPIC (Electoral Photo Identity Card) an nei vek tawh a, EPIC siamṭha duh tan Rs.25/- chawiin a siamṭhat reng theih a.

Electoral Roll thar hi recognized National/State Political Party te leh Serchhip Sub-Headquarters YMA hnenah a thlawnin sem an ni a; mi mala nei duh chuan Soft copy Rs.100, leh hard copy phek khat Rs.5 zelin lei theih tura ruahman a ni. Heng hi District Election Office-ah ngaihven theih a ni ang.

Tuna chhinchhiah dan chuan Mizoram puma vote nei zingah hmeichhia 12,045 in an tam zawk a, hmeichhia vote nei hi state pumah 3,46,271 an awm a, mipa 3,34,226 an awm a ni.

Champhai leh Mamit-ah chauh mipa vote nei tam zawkin, District dang zawngah chuan hmeichhia an tam zawk vek a, Aizawl-ah chuan vote nei thei 2,56,390 an awm a, heng zinga 1,33,449 chu hmeichhia an ni a, Aizawl district-ah hian vote nei tam fal hle a, Lungleiin dawtin, district pumah vote nei 93,817 an awm a, mipa aiin hmeichhe vote nei 25 in an tam a, Champhai district-ah vote nei 77,074 an awm a, Champhai District-ah pawh hian hmeichhia vote nei 318 in an tam zawk a ni.

Lawngtlai district chu vote nei awm tamna district zingah pali-na a ni a, mi 69,254 an awm a, Mamit district-ah 55,432 awmin, Kolasib-ah 50,745 an awm a, Vote nei thlemna ber Saiha District ah chuan mi 33,126 an awm a ni.Hetihlai hian, Electoral Roll duanchhina sawisel duh nei te leh inthun thar duh te, paih ngaite paih hun te leh thildang atan nimin aṭanga ni 15 thleng khian hun hawn a ni a, ni 16-ah Electoral Roll kimchang tarchhuah a ni ang.

Tuna Electoral Roll duanchhin hi veng tinah en theiha pekchhuah a ni tawh a, hei bakah hian ceomizoram.nic.in website -ah vawiin aṭangin en theiha siam tum a ni. E-Roll-ah a chuang thei dik tak thun an nih theih nan YMA chuan hma a la mek bawk a ni.