Kumin kum tawp lama Mizoram Assembly inthlanpui neihna tura inbuatsaihna hrang hrang sawipuiin Nilaini tlai khan Chief Electoral Officer Pu Ashwani Kumar chuan political party hrang hrang hruaitute a office-ah a titipui.
CEO chuan kumin inthlanpuiah India khua leh tui, kumtling chin zawng zawng ten an aiawh tur ram hruaitu thlanna-ah vote an thlak ngei chu Election Commission of India duhthusam a ni, a ti a. Mizoram District hrang hrangah Electoral Roll a hming chuang an pun zel rualin hmun ṭhenkhatah population nena khaikhina voters an la tam tawk loh thu te tarlangin khua leh tui dik tak ten Roll-ah an hming a chuan ngei theih nan sawrkar hnathawk ten hma an lak mek rual hian political party hrang hrang te ṭanpuina an mamawh hle a ni, a ti. CEO chuan Mizoram inthlanpui buatsaih kawnga hmalak dan tlangpui hrilh hre tur leh thil ṭul hrang hrang bawhzuia Election Commission of India a dawr tur thu a sawi lang bawk.
Pu Ashwani Kumar chuan Special Summary Revision atan Draft Electoral Roll July ni 1 a tarchhuah chu political party tin te kutah pek a nih tur thu a sawi a. Inthlanpui-ah hian Electronic Voting Machine (EVM) hman a ni dawn tiin July ni 29 aṭanga August ni 10 chhung hian uluk taka he EVM hi endik a ni dawn, a ti a. Political Party tin aiawhte he hunah hian tel ngei tura sawmin an duh ang thlapa rintlak leh tha a nih leh nih loh an hmaah enfiah leh entir an ni ang, a ti.
Inkawmhona hunah hian political party hrang hrang aiawh an kal tha hle a. An hriatfiah duh te zawtin CEO hnenah hian inthlanna fel leh fai, thianghlim leh zalen a awm theihna tura rawtna hrang hrang an neih te pawh an thlen a ni.