Khawsik natna chi khat Dengue do thla (Anti Dengue Month) chu Mizoram-ah nimin atang khan hman ṭan niin hemi pual inkhawm I & PR Auditorium-a buatsaih chu Health Minister Pu Lalrinliana Sailo chuan khuallian niin a hmanpui a ni.
He inkhawm hi Jt. Director (Planning), Health Services Dr. Rohmingthanga Ralte in a kaihruai a. Thusawitu Health Minister chuan he natna lar leh tihbaiawm tak, damdawia enkawlna bik la hmuhchhuah loh nimahse, invenna mumal taka kalpui a nih chuan chi-aina tur a awm lo a ti a. Health department in natna tlanglawn leh hri leng thei laka mipui mimir hriselna a ven kawnga thurawn leh thuchhuah a siam zawng zawngte hi mipuiin dik taka kan zawm tlan a pawimawh ber fo thin a ni, a ti. Health Minister chuan Health department hmalakna chu a chhuanawm hle thu sawiin an hnathawh that avangin rampum huap chawimawina sang tak tak 4 lai a zawnin a dawng a, an hnathawh that avang hian 13th Finance Commission pawhin hnathawhna tur cheng nuai 3132 zet a phalsak a, he sum hi a hun taka hmuh anih a ruahmanna anga dik taka hman a nih chuan Mizoram chu rampum huapa hriselna kawng tehfungah kum 20 chhung zet pakhat-na dinhmun a hauh phak a beisei thu a sawi a ni.
Minister chuan State Vector Borne Disease Control Programme hnuaiah natna hrang hrang 6 hmachhawn zingah Dengue a tel thu sawiin he natna hi Mizoramin la hmelhriat lutuk lo mahse thosi chi khat Aedes Aegypti an tih, tlangnel leh pung chak tak atanga kai theih a nih avangin mipui kan fimkhur a tul a. Thosi tih rem kawngah tun aia nasa a tan kan lak a tul tak zet a ni a ti. Natna chi hrang hrang do kawngah te hri thalo leh inkaidarh theih ven kawnga hmalak leh thisen pek kan uar deuh deuh chungchanga Health Department hlawhtlinna namenlo kan hmuh mekte hi mimal leh department in hmingthatna an telna tur a ni lo tiin politics ah pawh hamthat nana lak chi a ni lo, Pu Lalrinliana chuan a ti bawk.
Dengue do thla hman tanna pual inkhawmah hian he natna kaidarh dan te, natna vei hriatchhuah dan leh a enkawl bakah a invenna thil tangkai tak tak sawi a ni.