Mizoramah Sakei 4 aia tlem lo an la awm tih finfiah

Nimin hi Khawvel pum huapa Sakei humhalh ni, World Tiger Day a ni a, Environment and Forest Department Wildlife Division chuan, Mizorama Sakei awmchhun tlemte an mang mai lohna turin an chaw tur leh an chenna humhalh theuh turin mipui a ngen.

Nimina an thuchhuahah, Wildlife Division chuan, Mizoramah sakei 4 aia tlemlo a la awm ngei a ni tih DNA analysis hmangin hmuhchhuah a ni tawh a ni a ti a, heng sakei te hi humhalh ngei ni se a ti a ni.

Tun dinhmunah Khawvel pumah Sakei 4000 vel chauh an awm tawh niin mithiam ten an chhut a, Ram pakhata lak chuan India ram chu Sakei ngah ber a la ni a, 1706 vel awm ni a chhut a ni. Hetihlai hian khawvel hmun hrang hranga Sakei chenna zaa 93 chu mihring chenna khawpui leh Agriculture atan nuai chimih sak an ni tawh a, hei vang hian Sakei te chu an chep hle tawh a, hmun zim taka inthlah pung tur leh intungnung chho zel tur chuan beisei a bo viau a, hei vang hian an tam hmun siam chu tih makmawh a ni an ti.

Mihring leh Sakei hi hmun mamawhna avangin a rukin an inbei reng tih mithiam te chuan sawiin, ram ngaw tih chereu avangin Sakei te chuan hmun an hloh bakah an ei tur ramsa te pawh a tlem tial tial a, mihring ran vulhah te an tuan ta thin a, hei hi Mihringin thungrulin Sakei tam tak philin an that ta a, Sakei ruang te chu engmah a bo a bang awm lovin sumdawnnan hman chhoh zel a ni a, an mang mai a hlauhthawn awm tawh takzet a ni tih an sawi a, Sik leh sa inthlak danglamna avangin India leh Bangladesh inkara Sakei tamna hmun Sundarbans-ah pawh Sakei te hi an chep chho tial tial niin an sawi bawk.