Vawiin-ah Remna Ni lâwm dawn

Nimin kha ramhnuaia rammu MNF leh sawrkar laipuiin Inremna thuthlung an ziah champha ‘Remna Ni’ a ni a, Pathianni a nih avangin a lawmna siam a ni lo.

Kum 1986 June ni 30 zan khan khatihlaia MNF President Pu Laldenga, Union Home Secretary Pu RD Pradhan leh Mizoram Chief Secretary Pu Lalkhama te chuan he remna thuthlung ‘Memorandum of Settlement’ hi an ziak a. Rambuai hrehawm tak hnuaia kum 20 lai lo awm tawh Mizoram-ah remna leh muanna a lo thleng ta a ni. Hemi remna thuthlung ziah a nih hnu hian Pu Laldenga chu Chief Minister-ah lakluh a ni a, khatihlaia Chief Minister Pu Lal Thanhawla chu Dy Chief Minister-ah lalutin MNF leh Congress sawrkar inṭawm, sawr-kar lailawk ‘Interim Government’ chu din a ni a, ramhnuaia awm MNF mi 572 te chu an ral-thuam famkim nen an lo kir a ni.

Kumin Remna Ni hi sawrkar-in a hranpa-in lawmna a siam lova, MNF Party erawh chuan vawiin hian hmun hrang hrangah an lawm dawn a. An president Pu Zoramthanga chuan Bairabi-ah a hmang ang a; Aizawla an party office ‘Hnam Run’-ah Senior Vice President Pu Tawnluia hova an hman bakah district khawpui hrang hrang leh khaw hrang hrangah a lawmna hun an siam dawn niin MNF hruaitute chuan an sawi a. |henkhat chuan Inrinni lam khan an lo lawm tawh bawk niin an sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram