HPC(D) Demand Area huam chhunga YMA din khapna tunthla ni 25, Thawhlehni a HPC(D) ten an sut hnuah Tuisual Group YMA hruaitute chuan YMA din thar leh dan tur chungchang nimin khan New Vervek-ah an sawiho.
He inkhawm hi Tuisual Group YMA President, Pu LK Mawia’n a kaihruaia, hetah hian YMA din leh turin Central YMA Office-a seal lo thehluh tawh te chu Thawhṭanni-ah lak chhuah ni se an ti a, amaherawhchu, July ni 6-ah Tuisual Group huam chhunga YMA Branch hrang hrang hruaitute inhmuh khawm leh phawt nise, hetah hian kal zel dan tur atan a ṭha ber sawihova inrawn khawm leh phawt ni se an ti a ni. Tuisual Group YMA huam chhungah hian YMA ṭhiah a nih hnu khan khaw eng emaw zatah an khaw Youth Association din a ni a, inthlanna te pawh neih a ni a, chu chu ṭhiatin YMA Branch din ṭhat tur nge ni ang, Youth Association chu YMA ang a pawm tura Central YMA ngen tur ni ang tih te an sawiho hmasa phawt dawn a ni.
Hetihlai hian Tuivai Group hnuaia YMA Branch engemaw zatte chu an ding leh tawh a, Khawlian Branch YMA President, Pu Israel Vanlalruata sawi danin, an Branch Executive Committee Thawhleh zana ṭhukhawm thutlukna siam angin Khawlian Branch YMA chu din a ni leh tawh a, Inrinni khan an khuaah ruihhlo leh zu dapin an hnatlang nghal a ni.
Tarlan tawh angin, HPC(D) chuan an Demand Area huam chhunga YMA din khapna an siam chu Thawhlehni kalta khan an sut a, hemi rual hian Aizawl District huam chhunga VC 13 leh Kolasib District huam chhunga VC 2 inthlanna July thla chhunga neih tura ruahman pawh dodal an tum tawh lo tih an tarlang a ni.