Mizoram News

Tuikuk Vote thlaktir lo tura ngenna thehlût

Mizo Students’ Union ( MSU ) General Headquarters chuan nimin khan Chief Election Commissioner, Election Commissions of India, hnenah leh Chief Electoral Officer, Mizoram hnenah lehkha thehlutin, kum 2013 MLA General Election lo awm turah Tuikuk, Tripura Refugee Camp-a awm te Mizoram pâwna Vote thlâktir lo tura ngenna a thehlut.

MSU chuan Tripura Refugee Camp-a awm Tuikuk te, Mioram sawrkarin vawi tam tak lo haw tura a koh lawm lawm pawha engemaw Politics-a hamṭhatna beisei avanga vawiin thlenga rawn let duhlo lui te chu an awmna hmun Mizoram pawn (Tripura)-a vote an thlak an remti dawn lo tih an sawi a, Election Commission of India-a ngenna an thlen hian awmzia a nei lo a nih chuan Tripura a Tuikuk awm ten vote an thlak loh nan a ṭul angin hma an la dawn tih an sawi a.

Hun hmasa lama Mizoram Legislative Assembly (MLA) General Election ah te leh Member of Parliament (MP) Election-ah te Tripura Refugee Camp-a Tuikuk vote tih chingpen a nih dan Mizo mipuiten kan hre tawh a. Heng zawng zawng avangte leh koh lawm lawm pawh a rawn haw duh lo annih avangin kan Ram pawna Ballot Box nena zuk umzui a vote zuk thlaktir kher hi MSU chuan ṭul ati lo a. Ti lui lo tura ngenna thuneitute hnena a thlen piah lamah a tawp thleng in an dodal dawn tih an sawi a.

Tripura Refugee Camp a Tuikuk awmte hi Mizoram chhunga rawn let a, anmahni hming awmna Polling Station ah ngei vote an thlak duh a nih chuan India Dan pui hnuaia zalenna anneih angin vote an thlak ngei MSU chuan a duhsak a. Amaherawhchu, Mizoram chhunga an rawn let duhlo anih chuan Mizoram pawna Vote an thlak loh nan MSU chuan a ṭul angin hma a la zel dawn a ni, an ti.

Hetihlai hian Tripura relief camp-a Tuikuk awmte tana a bik taka electoral roll-a hming chuang lote thun belh theihna hun siama buaipui turin Special Registration Drive kalpui mek a ni tih Joint Chief Electoral Officer Pu H. Lalengmawia chuan a sawi a, hmanni lawka Tuikuk Relief camp leh Mamit district tlawhtu Election Commission of India a Director General Ashish Srivastava khan Electoral roll-a thun belh theihna atan Special Registration drive hi kalpui turin a ti a. Chumi hna thawk tur chuan Ningani khan Mamit District-a election official 9-te chu chhukin relief camp-ah Zirtawpni aṭang khan special drive hi an nei ṭan a. District dang, Kolasib leh Lunglei-a election official-te pawh vawiin hian relief camp ah hian special drive nei turin an kal leh dawn niin Joint CEO chuan a sawi a ni.

Pu Lalengmawia chuan Mizoram pumah electoral rolla thun thar duhte tan dilna hun hawn reng a nih thu a sawi a, chutih rualin Bru relief camp-a awmte chungchang hi chu a bika Election Commission thu anga kalpui a ni a ti a. Commission Director General in a tlawh ṭuma relief camp-a hruaitute’n an lo ngenna dung zuia ruahmanna hi siam nia a lan thu a sawi bawk a ni.

Joint CEO chuan relief camp-a Tuikuk vote neite hian Mizoram Assembly inthlan lo awm turah kum 2008 assembly inthlannaa tihdan ang bawkin postal ballot hmangin vote an thlak tura ngaih a ni a ti a. Election Commission aṭangin kaihhruaina fumfe a la awmlo chungin chutiang thova kalpui a ni leh dawnin a lang a ti. Relief camp pakhata awmte pawh bial hrang hrang leh polling station hrang hranga vote nei an nih avangin electronic voting machine (EVM) hman a remchanglo a ni a ti bawk.

Bru relief camp-ah hian tun dinhmunah vote nei mi 11,311 an awm a, heng vote neite hi district pathum – Mamit, Kolasib leh Lunglei district huam chhunga assembly bial 9 – Hachhek, Dampa, Mamit, Tuirial, Kolasib, Serlui, Lunglei South, Thorang and West Tuipui – a vote neite an ni hlawm a. Naisingpara relief camp-ah hian vote nei 5,872 awmin an tam ber a, Khakchangpara ah vote nei 390 awmin an tlem ber a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram