Serchhip Times, Zothlifim leh Vantawng chanchinbu-ten kum 2013 MLA inthlanpui neih tura Serchhip Constituency bika SMS kaltlanga Opinion Poll an buatsaih Result chu Inrinni tlai dar 4 khan Serchhip Times Office, Serchhip Bazar-ah puan a ni.
He Opinion Poll buatsaihah hian Vote lut zawng zawng 1002 aṭangin Pu C.Lalramzauva, MDA tling ring mi 374 an awm a, Pu PB Lalsawmliana, ZNP tlin ring mi 365 awmin, Pu Lal Thanhawla, INC tlin ring mi 254 an awm a, Pu Lalawmpuia Renthlei, Independent tlin ring mi 9 an awm bawk a ni.
Poll buatsaihtute chuan tun inthlanpui neih tur atan hian Serchhip Constituency-ah voter 16038 awmin, Serchhip District Election hotuten Vote tla ṭha tura nasa taka an beih avangin vote hi 95%- (vote 15236) tla tur angin an chhut tih an sawi a, Opinion poll-a vote sample lut 1002 hi khawvel hmun hrang hranga Opinion poll buatsaih danah mipui vote thlak tur zat beisei aṭanga chhutin, ngaihdan siamna atana sample tling zata ngaih a ni pha tih sawiin, Confidence level (he opinion poll rinngamna zat level hi a ni a, eng opinion poll/survey mah hian 100% confidence level a nei ngai lo a ni), hi za zela 95% anga lak niin, error margin +/- value lak zel a ni tih an sawi bakah mipui titi an ngaihthlak aṭangin za zela 1 vel (mi 152 vel)-in NOTA button an hmet tura chhutin, candidate pali te vote belhkhawm tur zat nia an beisei chu vote 15084 a nih thu an sawi bawk.
He Opinion Poll buatsaihah hian Pu C.Lalramzauva, MDA tlin ring mi 374 an awm a, chu chu za zela 37.33% a ni a. Chu chu confidence level 95% neia Poll buatsaihtuten Formula nena an chhutin dik loh theihna chance hi 2.90% a awm a. Serchhip Constituency-a Vote tla tura beisei aṭang chuan Pu C.Lalramzauva hian vote 5123 aṭanga vote 6068 inkar hmuh theihna chance hi za zela 95 a nei a ni.
ZNP Candidate, PB Lalsawmliana tlin ring hi mi 365 awmin, chu chu za zela 36.43% a ni a, dik loh theihna chance hi 2.89% a awm a. PB Lalsawmliana hian vote 5059 aṭanga vote 5931 inkar hmuh theihna chance hi za zela 95 a nei a, Pu Lal Thanhawla tlin ring hi mi 254 awmin, chu chu za zela 25.35% a ni a, dik loh theihna chance hi 2.61% a awmin, Pu Lal Thanhawla hian vote 3430 aṭanga vote 4217 inkar hmuh theihna chance hi za zela 95 a nei a, Independent Candidate, Pu Lalawmpuia Renthlei tlin ring hi mi 9 awmin, chu chu za zela 0.90% a ni a, dik loh theihna chance hi 0.60% a awm bawk a, Pu Lalawmpuia Renthlei hian vote 45 atanga vote 226 inkar hmuh theihna chance hi za zela 95 a nei a, heng result hi a tak takah (100%)-ah chuan a danglam hle thei tih an sawi bawk.
Poll buatsaihtute chuan Opinion poll hi za-ah zain a dik an ti thei lo tih an sawi a, thil awm dan tlangpui hriatna a ni tih sawiin, he opinion poll aṭanga a lan danah chuan MDA leh ZNP te hi hnehna chang thei turin chance an ngah deuh bik niin a lang thei a, amaherawhchu INC vote hmuh san theih ber nia lang vote 4217 leh ZNP vote hmuh hniam theih ber 5059 inthlauhna hi vote 842 chauh a ni a, chu chu vote tla tura beisei zat aṭanga chhut chuan 5.58% chauh a ni a, hemi vote 842 hi INC hian an hui theih chuan ZNP leh MDA vote hmuh theih zat nia lang percentage hi a pawt hniam ang a, hnehna an chang thei tho niin a lang an ti bawk.
Poll buatsaihtute chuan an Poll buatsaih hlutsak a, vote thlaktute chungah lawmthu an sawi a ni.