14th Finance Commission member te lo thleng ta

Zan khat riak a Mizoram sum mamawh te zirchiang tura lo kal 14th Finance Commission member-te chuan nimin khan Aizawl an rawn thleng a, Chairman Dr. YV Reddy kaihhruaia lo kal te hian nimin tlai khan 14th Finance Commission chuan vawiin tlai khan Assembly Conference Hall-ah Local body hotute, Political Party hruaitu te, sumdawng pawl hruaitute leh NGO pawl hrang hrang hruaitute a kawm nghal.

14th-finance-commissionThulakna tarlan danin, Local Bodies te hian hmasawnna atana Project hrang hrang mamawh an thehlut a, heng zingah hian Sinlung Development Council-in Tinghmun leh Tuiruang lui inkar kawngpui KM 20 siam chhunzawmna atana sum mamawh cheng vaibelchhe 3.9828 te, Mara Autonomous in an bial chhunga hmasawnna chi hrang hrang leh mamawh dang cheng vaibelchhe 200 hu te, Chakma Autonomous in cheng vaibelchhe 370 , Lai Autonomuous District Council in cheng vaibelchhe 172 hu an thehluh bakah Aizawl Municipal Council in cheng vaibelchhe 473 hu an thehlut a, Aizawl City Local Council pawhin Local Council House 82 sakna tur bakah Thlanmual In 82 sakna tur cheng vaibelchhe 20.05 project thehlutin, Zarkawt Local Council chuan YMA Recreation Centre sakna tur a thehlut bawk.

Political party zingah MNF chuan chhiah ngaihnathiam dan kawng dap tura rawtna leh Grant in Aid chungchang bakah District thar siam leh tihpuitlin rawtna te, Tui leh kawng mawmah bakah Lunglei bul Saitluka Airpost siam rawtna an thehlut a, MPC party pawhin hmasawnna mamawh chi hrang hrang ziakin a thlen bawk ani.

Central YMA chuan hmasawnna ruhrel chi hrang hrang mamawhna te, Government sector a hna ruak siam rawtna te, state naupang hmasawn mek tana duhsak bik rawtna te, Mipui tam lam mila project tehfung ringawt en lova State dinhmun en rawtna te, hmarchhak ṭhalai te ramchhung hnamdang nena en hranna lang ṭhin titlem tura inhmelhriatna ruahman tur rawtna te bakah District council-a Direct funding chungchanga YMA ngaihdan a thlen bawk a, MHIP pawhin an pawl tana mamawh chi hrang hrang a thlen bakah INTACH Mizoram Chapter chuan Mizoram-a thil hlui leh hnam ro hlu te humhalh nana sum mamawh te a thlen bawk a ni.

14th FC te hnenah hian Mizoram aiawh a kawmtu pawl hrang hrang hruaitu te chuan Mizoram special category state a nihna te, Infrastructure lian tham Revenue siam thei mamawhna chung-chang te, inkalpawhna kawng-a tih hmasawn Mizoram in a mamawh thu te, shareable budget a Mizoram chan 1% pawh tling lo chu  1% tal a nih theihna tura ngenna te, Mizoram a leilung hauhsakna awm lak chhuahhna thawh meka Mizoram hamthatna tur te, Mizorama district thar siam belh a tulna leh sum mamawh belh chungchangte, Mizoram chhim lama airport thar mamawhna te, Mizoram leiba Public Debt vanga harsatna a puih tur te in leh Mizoram mamawh zual lian tham chi hrang hrang te lungrual takin 14th FC hnenah ngenna an siam a . Local Bodies a hotute pawn development atana an mamawh hrang hrang te leh an harsatna te an thlen bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram