Zothlifim Logo
Loading ...
Mizoram NewsMizoram News

Pu MC Lalrinthanga, Khatla, Aizawl chu kum 2005-a tual chhung chanchinbua a thu ziak Pu Lal Thanhawla’n intihhmingchhiatna a ni tia a khinnaah court chuan thiam loh a chantir a, remna thu-ah Pu M.C.Lalrinthanga chu hetiang tileh tawh lo tur leh muanawm tak leh nungchang ṭha tak awm turin a intiam a. Thla 6 chhung enthlak a ni ang a, a intiam anga a awm loh chuan ₹2,000 a chawi ang.

Pu MC Lalrinthanga chuan tualchhung chanchinbuahte kum 2005 khan thu ziakin Pu Lal Thanhawla (Chief Minister) chu nasa taka hausa, bungraw manto tak tak nei, India ram hmun hrang hrangahte in leh lote nei ang leh eiru, chhung leh khatte duhsakna hlei hluaka duhsak angin a ziak a ni.

Aizawla Cilvil Judge Pu Vincent Lalrokima chuan section 500 of IPC hmangin Pu MC Lal-rinthanga chu thiam loh a chantir a. Court chuan chanchinbua thu ziakte chu Pu Lal Thanhawla tihhmingchhiat tumna emaw ni lo emaw Pu MC Lalrinthanga chuan thu ziakte chu a ziak ngei a ni tih a pawm a, chanchinbu-ahte chhuah a ni ngeiin mipuiin an chhiar ngei tih finfiah a ni a, chuvang chuan intihhmingchhiatna tlingah a pawm a, thiam loh a chantir a ni. Hremna thu-ah hetianga thiam loh chantir vawikhatna a nih avang te, tunhmain hetianga convict a la nih loh avang te, tisual leh tawh lo tura ziaka a intiam avangtein Judge chuan a chhuah a ni.