Aizawl SP Pu LR Dingliana chuan khawtlang leh mipui te puihna azarah Mizoram Police ten misual man leh hnu chhuina kawngah hma nasa takin an sawn mek tih a sawi a, hetihlai hian sualna pawhin a aia chakin hma a sawn ve zel avangin misual man leh an hnuchhuina kawngah Police te ṭha taka ṭawiawm zel turin khawtlang leh mipui zawng zawng te a ngen nawn leh a ni.
Aizawl SP ho hian ni thum chhung Crime Review Meeting, SP Aizawl Conference Hall-ah neih a ni a, heta an tarlan dan chuan, nikum chhung khan IPC hnuaiah thubuai 844 an ziaklut a, heng zingah hian 366 chu chargesheet a ni a, final report thehluh 27 awmin la chinfel loh thubuai 451 a awm a ni.
Local leh Special Law hnuaia thubuai ziahluh zat chu 215 niin, chargesheet 172 leh la chinfel loh 43 a awm a, nikum chhunga IPC leh Local Special Law bawhchhia man zawng zawng chu mi 978 niin, mi 219 te chu thiam loh chantira hrem an ni.