Nimin tlai dar 5:40 vel khan Excise Deptt Driver Pu F.Zatluanga (50) Venglai lunglei chu an duty-naah tlangval 2 – Lalremruataa (35) leh Rammuanpuia (29) Pu Lalramsanga (Asanga), Rahsi-veng fate ve ve nen inhnial buaiin kut an inthlakna lamah Pu F.Zatluanga chu tlu-in a insawhna hliam tuar lovin a boral.
Pu F.Zatluanga hi a thawhpui pakhat nen Rahsi veng mawng lamah duty-in an kal a. Rahsi Veng mawngah Lalremruata te unau nen hian an motor intawk lawiin an inhnial buai bakah kut an inthlak deuh a, hetia an intihbuaina lamah hian Pu F.Zatluanga hi tlu-in tho zui tur a awm ta lova, hemi hnu hian damdawiinah hruai nghal a ni a, damdawiin thlenpui a nih hnu lawkah a boral zui ta mai a ni.
Lalremruata leh Ram-muanpuia te hi YMA chuan manin Police kutah an hlan nghal niin thulakna chuan a tarlang a, Rahsiveng Branch YMA chuan hetianga ruihhlo do kawnga an thawhpuiin tlangval awm ṭha duhlote kut tuara a nunna hial a chân ta chu pawi an ti hle tih an sawi a, pawikhawihtute chu dan anga an chunga rorelna lekkawh turin thuneitute an ngen tih an sawi.