Kângmei chhuak thei vên dan tur sawiho

Nimin chawhma dar 11 khan Serchhip District Level Fire Prevention Committee chu an Chairman Pi Juhi Mukherjee, IAS hovin DC meeting roomah an ṭhukhawm a, kawng hrang hranga kangmei chhuak palh thei vên dan tur leh kangmei a lo chhuah palh pawha chhiatna tam zawk a thlen loh nana chêtlâk dân tur hrang hrangte an duang lawk.

Meeting hi Member Secretary Pu C.Lalbiaka Thenzawl Divisional Forest Officer-in a kaihruai a, nimin ṭhutkhawmah hian mipui ten kangmei laka invên pawimawhzia kan hriat theih nan District Headquarters bakah Civil Sub Division pahnih, Thenzawl leh North Vanlaiphai leh East Lungdar Block-ah te Awareness campaign neih tura rel a ni a, tin TV lama chhuah turin Talk Show buatsaiha district chhunga Cable TV Operator leh Sub Operator zawng zawng ten a tam thei ang ber an chhuah theih nana sem chhuah vek tura ruahman a ni bawk. Tin, kangmei venna lampang ziak tam turin Print Media te ngen an ni a, heti lampang hawi ziak tha ber hnenah lawmman siam a ni bawk dawn a ni.

He meeting-ah hian kangmei chhuak tam ber chu ram kang a nih thu leh venhimna leh a tikangtute hrem thuah kan dan neih leh hman lai, The Mizoram Prevention and Control of Fires in the Village Ram chu a chak tawk tawh loh hle thute sawi lan a nih rualin kan neih ang angte hmang tangkai turin VC te ngen an ni. Meeting Chairman Pi Juhi chuan fimkhur tawk loh vang leh ngaihsam vanga ram tikangtu chu ngaihzam a ni lovang tiin ram kang chungchanga complaint thehluh a nih phawt chuan police lam pawhin thubuai an ziak lut ngei tur a ni a ti bawk.