Mizoram News

Lunglei leh Lawngtlai Lirthei khalhtu leh neituten lungawi lohna lantir tum

Lunglei District Truck Owners Association chuan buhfai phurh man pek thuai phut na’n vawiin aṭangin Lunglei District-a buhfai phurh an chawlhsan dawn.

Lunglei District Truck Owners Association President, Pu Samson Zoramthanga sawi danin, buhfai phurh man bill hi rei tak pek tawh loh a nih avangin an tan phurh zawm a harsa a, buhfai phurtu ṭhenkhat chu a pung awma pawisa puk a hnathawk te leh bathlau a motor lei te an nih avangin an tan nghah reng a harsaa, mi ṭhenkhat bill kum 2011 amite pawh la pek loh zingah hian a tel niin a sawi a ni.

Zawhna chhangin Pu Samson Zoramthanga chuan, an nawrh chhunga sawrkarin buhfai phurtu tur midang a ruat anih chuan chungte chu dan an tum niin a sawi bawk.

Hetih lai hian, Food, Civil Supplies & Consumer Affairs Director, Pu R. Lalvena chuan bill pek danah duhsakbik an awmlo niin a sawi a, Mizoram pumah pek dan phung inanga kal a ni a, theibik nei lovin bill te chu an senior dan a zirin pek thin a ni a tia, amaherawhchu tunah hian sawrkar kum tawp lam a nih avangin pawisa a awm lova, hei vang hian harsatna tawh mek niin a sawi a ni. Director chuan bill pek tawh chin DCSO report-a a lan dan chuan kum 2012 April thla thleng pek tawh a ni a t i bawk.

Hetihlai hian Lawngtlai-a lirthei neitu leh khalhtu inzawmkhawm pawlin Lawngtlai khaw chhung kawng chhe lutuk chungchanga tun thla ni 10-a bandh huaihawt an tum chungchangah nimin khan thuneitute nen an inbia a. Thutlukna mumal erawh chu a la awm rih lo.

Lawngtlai khawpui kawng chhe lutuk siamṭhat phutna’na All Vehicle Owners and Drivers Association te’n Bandh huaihawt an tum chungchangah hian nimin khan district Bawrhsap Pu J.Hming-thanmawia hovin district thuneitute nen thil an sawi hova. He an inhmuhkhawmnaah hian Minister of State Pu C. Ngunlianchunga bakah PWD SE leh EE te bakah Central Young Lai Association aiawhin an general secretary a tel bawk.

Minister-in Lawngtlai khawchhung kawng siamṭha turasorkar an nawr tawh thu leh tun fur thlen hma ngeia siam tum a nihthu a sawi a, bandh hi huaihawt lo turin a ngen a. Lirthei neitu leh khalhtu intelkhawm aiawhte chuan band huaihawt chuan thil duh ber a nihloh thusawiin Minister zahawm tak leh Bawrhsap ngenna chu zahawm an tih thu sawiin ngaihtuah ṭhatleh an intiam a, band ṭan an tum ni hmain chawlhkar khat lai a la awm avangin hemi hun chhunga sawrkar hmalaknate thlir zuia PWD hotute nen pawha in be pawp reng tura inrem chungin meeting hi tihtawp a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram