Vantlang zu inna hmun ‘Bar’ siam tum lo
Excise and Narcotics Department changtu Minister Pu R.Lalzirliana chuan Mizorama zu khap burna dan hlihna atana dan siamṭhat tura duan chu tun Assembly inkhawm lo awm tura putluh hman tum a nih thu a sawi.
Pu R.Lalzirliana chuan he dan siamṭhatna tur duan lawk hi zawh fel a nih tawh thu a sawi a; a hova ngaihtuahho a ennawn leh phawt hnu-ah Law Department pawmpui tura thawn tum a nih thu a sawi a. March ni 18 aṭanga ṭan tur Mizoram Assembly 7-na ṭhutkhawm vawi 2-na chhunga putluh hman hram tum a nih thu a sawi. Zu Khap burna dan hlipa zu zawrh a nih pawhin vantlang zu inna hmun ‘Bar’ erawh chu siam a nih loh thu thu a sawi bawk a ni.
He dan siam tur duanah hian sawrkar term hmasa lama zu khap burna dan zirchiangtu Study Group-in sawrkara report an thehluhte pawh ṭangkai taka hman a nih thu a sawi. Hemi hmaa mipui hmaa a thusawi-ah Excise and Narcotics Minister chuan tunlaia Mizo ṭhalai tam takin zu an in avanga zu leh a kaihhnawih thil avanga an chhiatpui nasat thu sawiin, zu-ah hian damdawi leh thil ṭha lo tak tak pawlh a nih ṭhin avangin, zu in lo thei lo te’n zu ṭha an in theih na’n hmalak mai a ṭha zawk nia ngai tam tak an awm ve tawh bawk avangin, ngun taka ngaihtuah chungin zu khap burna dan chu thlahdul hret tum a ni, a ti a ni.
MLTP Act Zirchiang tura din ‘Study Group’ report aṭanga a lan danin Mizoram Excise Act, 1973 leh Rules chu Assembly hmasa ber khan a siam a; mahse a taka hmang lovin kum 1984 October ni 10 aṭanga hman ṭan a ni a. Kum 1992 khan he dan hi siam danglam a ni a; mahse a taka hmang lovin 1995 a siam zu khap burna dan Mizoram Liquor Total Prohibition Act chu kum 1997 February ni 20 aṭang khan Auto-nomous District Council 3 huam chhung tih loh Mizoram pumah hman ṭan a lo ni ta zawk a ni.
Study Group report-in a tarlan danin Zu khap burna dan hman a ni chung hian sipai leh para-military force unit 12 hnenah zu hralh leh pek chhuah phalna pek an ni a. Chubakah doctor-in a chawh avanga zu in phalna pek chu civil mi 178 leh sipai bang 2,231 an awm a. Civil mite hian departmental store zu man sa aṭangin an lei a, sipai bangte erawh chuan sipai canteen dawr aṭangin an lei thung a ni.
Excise and Narcotics department-in an chhinchhiah danin kum 1984 leh kumin January ni 13 inkar chhung khan ruih hlo (drugs) vanga thi Mizoramah mi 1,282 an awm tawh a, heng zinga 1,146 chu mipa an ni a, a dang 136 te chu hmeichhia an ni a. Spasmo Proxyvon leh Parvon Spas vanga thi tam berin mi 1,1 45 an ni a, heroin vanga thi 96 leh ruihhlo dang vanga thi 41 a n awm bawk.
Kum 1997-2012 chhungin zu chhe in vanga thi mi 55 chhinchhiah an ni a, hengte hi zu-a Methyl Spirit pawlh in avanga thi 36, Pathedine pawlh vanga thi 2, Methanol pawlh in vanga thi 1, BEDC (Burma zu) in vanga thi 2 leh engnge pawlh a nih hriat loh in vanga thi 14 an awm a ni.