MSU-in lungawi lohna lantir

Mizo Students Union, MSU chuan tun thla ni zana Delhi Munirka-a Mizo hmeichhe tleirawl kum 14 pawngsual duh loh lantirna leh hmarchhak mite’n ramchhunga misual kut an tawrh thin duhlohna lantirin nimin khan Aizawla Governor chenna Raj Bhawan gate bulah an pungkhawm a, Governor Office kaltlangin President, Prime Minister, Union Home Minister, Delhi Chief Minister leh Delhi Police Commissioner hnenah Memorandum an thehlut nghal bawk.

MSU President Zodinpuia chuan, India hmarchhak mipuite chunga inenhranna leh hleihlenna a awm nawn leh a nih chuan buaina nasa zawk a thleng lo vang tih a sawi theih loh va. India sawrkarin hmarchhak mipui-te hi tha taka min kuangkuah thei dawn lo a nih chuan kawng dang kan dap a ngaih hun a la awm ang, Zofate’n India ram chhung a harsatna kan tawh chang a Mizoram MP te an ngawi bo mai thin chu a dem thu a sawi a. He hunah hian Siamsin Pawlpi (SSPP) Headquarters, Aizawl General Secretary K. Muan Lala pawhin thu a sawi bawk.

MSU hian nimin khan an din champha vawi 28-na an lawm a, he ni pual hian Aizawl-a hnuchham in 3-ah tanpuina an hlan a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram