Zothlifim Logo
Loading ...

Nimin khan Mizo Zirlai Pawl Gen. Hqrs. chuan Executive meeting an nei a, he meeting Pu Lalhmachhuana President kaihruai-ah hian March ni 11-a MZP rorelna sâng MZP federal council Sitting neih tura agenda turte thlitfimna leh March ni 5, 2014-a Zoram Ni hman dan tur chungchang te rel a ni.

Meeting-in MZP federal council Sitting neih tura Agenda chhawpchhuah tura a pawm te chu – Mizo zirlaite Central Service-ah tun aia tam kan luh theih nan MZP in hma la rawh se tih te, Mizorama college hrang hrangah Environmental Studies(EVS) zirtir tur bik lecturer dah a nih theih nan MZP in hma la rawh se tih te, MZP in Civil Service (MPSC/UPSC) a Mizo tling te hnenah chawimawina pek an nih theih nan hmalak ni rawh se tih te, Mizoram zirna in hrang hranga hostel dinhmun te enfiaha mumal zawka kalpui a nih theihnan hmalak ni rawh se tih te, Mizoram pawna Mizo zirlai ten online Application hmanga Scholarship an dil theih nan hmalak ni rawh se tih te, Mizorama Mizo zirlai ten Mizo ṭawnga pawl 12 thleng zirna an kalpui theih nan Mizo ṭawnga zirna bik school din a nih theih nan hmalak ni rawh se tih te, Mizoramin kan state pual bika All India Services(IAS/IPS/IFS(Forest)) cadre hran kan neih theih nan hmalak ni rawh se tih te, Mizoram Sawrkar hnuaia Elementary stage (Primary school leh Middle school) a mamawh aia tam school awm hi sawikhawma tihtlem a nih theih nan hmalak ni rawh se tih te, Mizoram leilung hausakna haichhuah tum mekah hian ram leilung fa (Zofa) ten a tam thei ang ber hna kan thawh theih nan a ṭul angin Sawrkarin hma la rawh se tih te a ni.

MZP chuan March ni 5, 1966-a India sawrkarin a ramchhung mite chunga vawiin thlenga a la tih ngai loh, Jet Fighter hmanga Mizoram vawi tam tak a bomb champha chu “ZORAM NI” tiin 2008 aṭang khan a hmang ṭan a, kumin March ni 5 pawh hian MZP chuan hman leh nise tiin a rel a. ZORAM NI hman chungchangah hian MZP in a ngaih pawimawh ber chu kan ram leh hnam himna leh Zofate inkara inlungrualna leh inunauna ṭha a awm hi a ni a, kan hnam history-a ni chhinchhiahtlak leh nasa taka kan tawrhna hi theihnghilh mai lo va, kha kan tawrhna khan ram leh hnam hmangaihna rilru thar min put tirin Zofate thinlungah zalenna leh remna leh muanna hlutzia a tharin min hriat chhuah tir fo rawh se tih hi MZP duh dan chu a ni an ti a, MZP chuan Zoram Ni hi urhsun taka hmang turin Mizo mipui zawng zawng te a sawm bawk a ni.