India News

Parliament-ah Interim Railway Budget pharh

2014-2015 chhung atana railway budget lailawk Interim Railway Budget nimina Parliamenta pharh a langsar zual te chu Premium train thar 17, Express train 38 leh passenger train 10 service thar tur leh nunna leh thil neih channa awm lova passenger te himna tur hmalakna siam belh te an ni a. Passenger te chuan man leh bungraw phurh man khawih danglam a ni lo bawk.

Lok Sabha ah budget hi pharin Railway Minister Mallik Arjun Kharge chuan, Mainline Electric Multiple Unit (MEMU) rel 4 leh Diesel Electric Unit (DEMU) rel 3 service thar tir a ni dawn bawk tih a sawi a, rel a kangmei chhuak a thlen tawh loh nan a hmalakna siam belh dan te sawiin Rajdhani Express rela kangmei leh meikhu chhuah thulh a hriat vat theihna hmanrua enchhin mek ani tih a sawi. He enchhina hi a hlawht lin dan a zirin passenger phur chi rel lian zawng zawng ah dah a ni dawn tih sawiin passenger te himna chu eng thil nen mah thlak thleng chi a ni lo tih a sawi. Passenger te tan a remchanna thil a puan zingah ATM tam zawk dah, seat hauhsa lo te tan mobile phone hmang a ticket book leh PNR dinhmun hriat theihna te, thil dang bakah a tel bawk.

Railway Minister chuan UPA sawr-karin hmarchhak bial rail-a kal pawhna a ngaih pawimawh thu leh hnam inpumkhatna tihngheh a duh thu a sawi a, km 510 a thui Rangiya-Murkong-selek rel kawng te chu a lian chi a phah hna thawh mek ani tih a sawi. Tun sawrkar kum chhung hian Arunachal Pradesh a Harmunti Naharlagun rel kawng hawn ani dawn tih sawiin, Meghalaya a Dudhnoi-Mehendipathar rel kawng thar pawh thla leh khian zawhfel a ni dawn tih a sawi bawk

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram