Lunglei MZP Hqrs hruaitute, nimina Chakma Autonomous District Council (CADC) huam chhunga khaw pakhat Borapansuri khuaah ZOFATE CHAWLHBUK sak tum te chu Lunglei Police ten dangin, an hruaitute an man a, buaina chhuak zui a awm loh nan heng mi 6 te hi hren zui an ni.
Thulakna tarlan danin, Lunglei MZP Hqrs hian hun rei tak aṭangin Chawlhbuk sak hi an lo tum lawk tawh a, hei hi Ram leh Hnam humhalh zelna atana an hmalakna a ni a, chawlh buk sa tura kal, Lunglei MZP hruaitu OB te chu Lunglei pelh Sazaikawnah police ten lo dangin CrPC Section-151-na hmangin an lo man a hei bakah hian Tlabung aṭanga kal tum MZP Hqrs Lunglei hruaitute leh Tlabung Sub-Hqrs MZP hruaitute chu Tlabung police in CrPC Section-151-na hmang bawkin an lo man a ni. Tun dinhmunah, he thil avanga boruak duhawm lo thle ng a awm lo niin thu-lakna chuan a tarlang bawk.
Thulakna chuan MZP te hian kum 2012 September khan Borapansury khaw daiah Zofate Chawlhbuk sak an dil a, Chakma Autonomous District Council leh VC lam pawhin kan ngaihtuah dawn nia tiin thu an thlah a, a remlohna engmah an sawiloh avangin rem turah an ngai mai a, Young Chakma Association lam pawhin a hmun tur enho-pui tura an hrilh avangin helai hmuan In sak hi nimin aṭang khan ṭan tumin hmun hrang hrang aṭangin Borapansury hi an pan khawm a, Lunglei aṭangin MZP Hqrs. hruaitu te chu an ei leh in tur leh Rangva nen Sumo hmangin an kal a, Sazaikawnah hian man an ni ta a ni.