UN Mission Team-ten Mizoram tlawh dawn

Chief Minister Pu Lal Thanhawla leh NLUP Implementing Board(NIB) hmalakna kal zelah India rama UN Organisation pawimawh tak tak 5 – UNIDO, FAO, ILO, UNDP leh SouthAsia enkawltu bik UNIDO hnuaia Sustainable Energy for All hotu rual te chuan February 13 khian Mizoram an rawn tlawh dawn a. Anmahni lo dawnsawn dan tur leh Mizoram tana hman ṭangkai dan tur ngaihtuahin nimin khan Chief Secretary Pi L.Tochhong hovin NIB Vice Chairman Pu PL Thanga leh sawrkar department hotu pawimawh te chu Chief Secretary conference room ah an ṭhukhawm.

UN Team te hi Pi Ayumi Fujino, UNIDO Representative & South Asia Regional Director-in a rawn ho dawn a. Member dang lo tel turte chu, Dr. Peter Kenmore, Head, FAO; Pi Tine Staermose, India rama ILO hotu, Pu Jorn Sorensen, Country Director, UNDP leh Pu Sandeep Tandon, National Expert, UNIDO hnuaia Sustainable Energy kaihhnawih zawng zawnga hotu te an ni.

Mizoram an cham chhungin NLUP hnuaia kuthnathawktute eizawnna ngelnghet siamsak mek chu phuisui zawka kalpui na tur kawng te, ramngaw hausakna awmze nei leh hlawk zawka hman tangkai dan tur te, leihnuai tuihna humhalh leh tihpun na tur te, mau hmanga eizawnna tih hmasawnna tur leh mau sawngbawlna changtlung zawka kalpuina tur te, ran hrileng laka ranvulhte an him zawkna tur te, Mizoram University nena thawhhona tur chungchangah te Mizoram sawrkar nen hmalakho dan tur an rawn en dawn a ni.

Mizoram an cham chhungin UN Team te hian sawrkar department pawimawh te nen hmalakna tur chungchang sawihona meeting an nei ang a. Hemi hnu hian Mizoram University leh Mau Sawngbawlna hmun te, Chawhmeh Bazar te leh hmun pawimawh dangte an tlawh ang.