Zothlifim Logo
Loading ...

14th Finance Commission member te chuan nimin khan Legislative Assembly Annexe Conference Hall-ah Chief Minister Pu Lal Thanhawla kaihhruai Mizoram sawrkar hotu lian te nen meeting an nei.

Meeting-ah hian Chief Minister Pu Lal Thanhawla chuan 14th Finance Commission member lokal, an Chairman Dr. YV Reddy leh member 11 dangte chu hmun kilkhawr leh state tlawh hlawhlo ber Mizorama an lo kal chu thinlung taka alo lawm thu sawi a. Chief Minister chuan GSDP leh Human Development Index-a Mizoram chu nasa taka a ṭhan thu a tarlang a, hetihlaiin hmasawnna ruhrel tlakchhamna avanga retheihna leh eizawnna nghet neilo tam tak a hrin phah thu a sawi a. Mizoram sawrkar chuan sum hailuhna – tax leh non-tax-ah ṭan la hle mahse tax devolution tam zawk leh grants kan mamawh reng thu sawiin, cess leh surcharge chu sharable poola siam nise a ti a. State chanvo, aggregate share pawh 50% a tinsan nise a ti a. Special Category State kan nih angin central sawrkarin chhiah tlingkhawm aṭanga min pek ṭhin 0.3% aia tlem min pek ṭhin chu minimum floor rate a 1% ah tal fix theih nise tiin a thlen bawk a. Ramngaw leh forest cover atan kal dan phung bakah 60% step up siam turin Commission hi a ngen bawk a. Sawrkarin leiba a neihte hi Commissionin a award period chhunga thaibo sak turin a ngen bawk a ni.

Chief Minister hian local bodies te leh autonomous council te tan sum tam zawk ruahman saka, alo berah cheng vaibelchhe 8047 dahsak turin a ngen bawk a ni.

Memorandum a telh hmaih palh Education Reform Commission Report tihpuitlin nana sum mamawh chu supplementary memorandum anga thehluh leh Commission hnena a ngen nghalna chu an remti bawk a ni.

Mizoram sawrkarin 14th Finance Commission-ah hian kawng hrang hranga sum mamawh turte tarlangin memorandum a thehlut a. Sum mamawh tur zawng zawng hi cheng vaibelchhe 48164.05 a ni a. Memorandum-ah hian state te te tana an tih ve tur an phut ṭhin hi tihhlawhtlin a harsat ṭhin avangin an thil phut te hi tinêp turin ngen a ni a. Non Plan Revenue Deficit Grant hnuaia sawrkar hnathawk hlawh tur, a pangngaia dah a nih bakah, 7th Pay Commission lo chhuah hun atana lo inruahmanna turte, contract employees leh muster roll employees te regularize na tur te, post ruak pawimawh tak, sum awm loh avanga hnawh khah theih loh hnawh khawhna tur te Memorandum-ah hian dah a ni bawk a.

Memorandum-a state specific needs hnuaia department 32 leh ADC 3 te bakah State Information Commission leh AMC te’n infrastructure development atana rawtna te dah tel a ni bawk a. Lokayukta dinna turte, district thar hawnna turte, Mizoram House te cheiṭhatna tur atan te, Food Security Act tihpuitlinna tur atan te, National leh State Disaster Response Force training centre tur atan leh operation centre tur te, lemchan lam tih hmasawnna tura film city dinna turte, media leh film facilitation centre sakna tur te, department hrang hrang building leh quarters sakna tur te leh Aizawl khawpui chhunga ropeway siamna tur te dah tel a ni.

Finance Commission hian ṭawiawmna ṭha tak Chief Minister leh sawrkar hotute hnen aṭanga an dawn avangin lawmthu an sawi a, an thil ngaihpawi-mawh an thehluhte chu Commission ṭhutkhawm huna uluk taka an lo sawiho tur thu an sawi bawk a. Mizoram sawrkar nen inpawhtawn taka an kal tur thu an tarlang bawk a ni.