Bilaipur-a balu phura kal Mizo 7 Thawhṭanni zana aṭanga Assam Police ten an hren te lakchhuah tuma nimina kal te chu an hlawhchham niin Phaisen YMA President Pu H.Lalnunthara chuan a sawi a, mitang lak chhuah an nih dawn chuan buai bak hmabak an nei talo nia an hriat thu helai hmuna kal VC te leh YMA te chuan an sawi a, Sub Hqrs YMA Kolasib chu hemi chungchang-ah hian an thukhawm ve nghal bawk a ni.
Niminpiah khan Hailakandi Jail-a hren te lachhuak tur hian Driver chhungte an kal a, Mizoram sawrkar aiawhin ECF leh Vairengte OC bakah an kal bawk bakah, Phaisen YMA te leh Phaisen VC te chu an kal bawk a, Hailakandi CJM hnenah thiltihsual engmah Driver te chuan tih an neih loh thu hrilhin chhuah turin an phut thu an hrilh a, Driver te chhuah tur a an phutna chu a hlawhchham niin thudawn a ni.
Thudawn danin lakchhuah tuma kalte hian Bail an tum lo hrim hrim nia sawi a ni a, Bail dawn pawh nise Case register mumal a awmlo nia sawi a nih laiin, Assam Forest Act hmanga Driver te hi hren an nih thu hrilh an awm bawk a, a lan dan chuan Mizo Driver te hi hren hrim hrim an tum nia an hriat thu an sawi a, hetihlai hian ukil rawih a bail bak tih theih a awm loh thu hrilh an ni bawk a, Ukil lam hian mi pakhat tan `1000/- zel an phut niin thu dawn a ni bawk.
Heng bakah hian an Motor te pawh man chuang si lovin chetsawn an phal sak lova, Handyman te pawh kalsawn an phal chuang lova, Police-in an Motor dinna hmunah silai nen an kalsawn lohnan an veng niin YMA hruaitute a hmuna kal te chuan an sawi bawk a ni.
Sub Hqrs YMA Kolasib chuan Sub Hqrs YMA Office Kolasib-ah Emergency meeting nei nghalin, thuchhuah an siam zui nghal a, an thuchhuahah chuan Mizo Driver Balu phur motor 7 te Assam Forest ten lo manin, an Driver te Hailakandi Jail ah an dah hi pawi kan ti a, kan Mizo Driver dan diktaka balu lei te hrem an nih laia, a tidiklotu vai leh vai an inhrem duhlo hi hriatthiam har kan tiin, hnam inthliarnaah kan ngai a. Heng kan Mizo Driver Hailakandi Jail a dah mek te hi thudelhkilh awm lova a rang thei ang bera chhuah turin Sub-Hqrs’YMA, Kolasib chuan a phut tlat a ni, tiin an sawi a, chhuah an nih loh chuan hmalakzui zel dan tur chu OB te kutah an dah nghal bawk a ni.