Information & Communication Technology(ICT) department leh Mizoram Journalists Association (MJA) te buatsaihin sawrkar rorelna dik atan e-governace pawimawhna zirhona, “Seminar on good governance”chu nimin khan NLUP Implementing Board conference hall-ah neih a ni a. Pu Lal Thanzara, Minister of state for ICT chu khuallian a ni.
ICT department leh MJA ṭangdun hmalaknain e-governance chungchang zirhona seminar hi February thla aṭang khan district khawpui 7 ah te neih a ni tawh a. A hnung kharna seminar nimina neihah Khuallian Pu Lal Thanzara chuan “Rorelna dik” chu tuna Mizoram sawrkar innghahna thupui a ni tih sawiin, tun sawrkar rorelna hnuaia mipui ten an chanvo dik tak an chan theihna tura kawng hrang hranga sawrkar hmalakna te a tarlang a. ICT hmalakna bikah chuan khawpui leh thingtlang kilkhawr zawka cheng ten awlsam zawka sawrkar an dawr theihna turin Common Servie Centre, Public Information Kiosk leh Rural Information Kiosk ṭhahnem tak din a ni tawh a. State Data Centre chu peih thawkhat a ni tawh bawk a. Mizoram sawrkar inrelbawlna siamṭhatna tura Mizoram Administrative Reform process atan leh rang taka mipuite mamawh sawrkarin a chhan theihna hmanrua atana Service Delivery Mechanism buatsaih nan World bank aṭangin funding hmuh a nih tur thu pawh a tarlang bawk.
Pu Lal Thanzara chuan ramin hma a sawn rualin mipui ten sawrkarah phut an ngah tial tial a. An dikna leh chanvo au chhuahpui nachang an hre deuh deuh chu thil lawmawm tak a ni, a ti a. Hemi rual hian rorelna dik leh ṭha nei turin ram hruaitu te bakah mipui pawhin an mawhphurhna an hriat ve a pawimawh hle a ni, a ti a. Sawrkar-in a hmalakna turah fimkhur tak leh ngaihtuahna tam tak senga thutlukna a siam te mipuiin an zah thiam a, sawrkar hmalakna te a hlawhtlin theihna tura an mawhphurhna an hlen ve a ṭul a ni, a ti a. Rorelna dik leh ṭha a awm theih nan sawrkar leh mipui inkara hmun âwl hnawhkhat turin media lama thawkte chu an pawimawh hle a ni, a ti a. Hemi atana MJA ten good governance chungchang zirna an nei chu lawmawm a tih thu sawiin Pu Lal Thanzara chuan hlemhletna do tura sawrkar hmalaknaah pawh media a thawkte chu sawrkar puibawm a, an ke pen khalh ngil turin a sawm bawk a ni.
Seminar ah hian Pu Lalthlamuana, Chief Infor-matics Officer, ICT chuan “good governance through e-governance” tih thupui hmang-in rorelna dik leh tha nei tura e-governance pawimawhna leh hemi atana ICT hmalakna te, a hmachhawp hrang hrang te nen a sawifiah a. Ram rorelna ṭha nei tura sawrkar leh mipui mawhphurhna neih ve ve te, sawrkar thutlukna ah mipui an tel ve a pawimawh zia te, sawrkar leh mipui inkarah inpawhna leh thu inngaih chan tawn a ṭulna te, thingtlang hmun kilkhawr bera awmte tan sawrkar dawrna kawng awlsam leh hautak lo zawk buatsaih sak a ṭul zia te a tarlang a. Zawhna leh chhanna hun ah kalkhawm ten zau takin sawihona an nei zui a ni.
Nimin Seminar ah hian nikum December ni 7 a boral, Pu K.Lalrochana, Lamtluang chanchinbu Editor, Lunglei chhungte hnenah Minister chuan MJA welfare fund atangin cheng nuai 1 ralna thilpek a hlan a, Seminar hi MJA President Pu C.Lalrambuatsaiha’n a kaihruai a ni.