India hmarchhakah 7.5 richter scale-a na-in zanreiah lir nghing ta se, a lo berah mihring 8,40,000 vel an thi tura chhut a ni a, mi nuai 55 vel an hliam thei dawn a, Mizoramah chuan mihring 17,000 vel an thi thei dawn niin National Disaster Management Authority hotute chuan March ni 13, 2014-a Aizawla thuthar lakhawmtute an kawmnaah an sawi.
India hmar chhak chu lir natak nghin theihna (seismic zone 5) chhungah a awm tih sawiin, National Disaster Management Authority atanga lokal te chuan, India hmar-chhakah kum 1897 leh 1952 inkarah khan lir vawi 10 vel a nghing tih an sawi a. Kum 1952 atangin hmarchhakah lirnghing na lutuk a awm zui lo a, mahse, lir na tak nghing thei reng a ni, an ti. Kum 1952 khan India hmarchhakah lirnghing na tak, 7.5 richter scale-a na in lir a lo nghing tawh a ni.
Mizoram Remote Sensing Application Centre (MIRSAC) in a zirchiannaah Mizoram chhungah lirnghing inṭanna (epicentre) hmun engemaw zatah a awm tih an sawi a, ṭhenkhat chu richter scale hniam deuh leh a san chang pawh tum engemawzat a awm a. Hmarchhak state zingah Sikkim, Arunachal Pradesh, Meghalaya, Assam leh Manipur ai chuan Mizoram dinhmun chu tlema ziaawm deuh tura ngaih anih laiin lirnghing na tak thleng thei anih avangin insak dan leh kawng hrang hrangah fimkhur a ngai niin an sawi a, Mizoram ah kum 250 kalta chhungin magnitude 4.0 chunglam lirnghing tum 11 a thleng tawh a, a na ber chu magnitude 6.1 a ni.
MIRSAC chuan Wadia Institute of Himalayan Geology (WIHG) a scientist te rawn chungin Mizoram state tan bik lirnghing hlauhawm theih dan an lo zir tawh a. Bureau of Indian Standards (BIS) in an zirchian dan nen pawh a inang hle a, hmarchhak state te hi lirnghing hlauhawm ber Zone V ah a awm tih an sawi a. Lirnghing lo thleng palh ta se Mizoram hmar lam aiin chhimlam chu ziaawm deuh hlek turin an chhut a ni.
‘Lirnghing hi leilung sakhatah a na bik a, leilung thawl, Mizoram angah chuan tlemin a ziaawm deuh’ tia ngaihdan chungchangah chuan mithiamte ngaihdan a inanglo a. MIRSAC a an hotupa Dr. RK Lallianthanga chuan, “kan insak dan te, kan leilung a ngheh loh avang leh leilung kan sawisak dan dikloh avang hian lirnghing na tak thleng thei a ni a. Engemaw avanga lo buai phili viau a tha lo a, mahse lo inbuatsaih erawh-chu a pawimawh a ni,” a ti.
Geology & Mineral Resources Director Dr. H.Lallen-mawia pawhin lirnghing chungchang hi an theih ang tawk tawkin an lo zir tih a sawi a, “Lirnghing hi wave anga kal a ni a, Aizawl leh Mizoram hi a intanna (epicentre) anih chuan a hlauhawm hle ang a, epicentre hi hmundang anih chuan a ziaawm deuh turah kan ngai a ni,” a ti.