Zothlifim Logo
Loading ...

March ni 13, 2014 a Serchhip-a “Mega Mock-Drill” (Chhiatrupna thlen thulh a hmalak dan tur lemchan) neih tur chungchang ngaihtuahin nimin chawhma dar 11 khan DC Meeting Room-ah District chhunga Sawrkar Department hrang hrang hotute an ṭhukhawm

Serchhip District Bawrhsap Pi Juhi Mukherjee, IAS , District Disaster Management Authority Chairman ni bawk hova nimina ṭhukhawm chuan Mega Mock-Drill neihna tur atan hian Serchhip khawpui huam chhunga hmun hlauhthawnawm leh him lo deuh nia an hriat hmun 5 an thlang chhuak a, heng hmun thlanchhuah te viltu tur Incident Response Team leh an Commander tur ṭheuh pawh ruat nghal a ni a, Relief Camp siamna tur hmun te, Staging Area leh hemi ni atana hman tur motor leh ambulance te pawh ruahman fel nghal a ni bawk.

Mega Mock-Drill neih hunah hian National Disaster Management Authority, State Disaster Management Authority leh District hrang hrang atang Observer 18 an tel bakah National Disaster Response Team te, Mizoram Police, 14 Assam Rifles, Sawrkar Department hrang hrang bakah Volunteers 100 chuang an tel dawn a, a tel tur te tan hian March ni 6, 2014 (Ningani) chawhma dar 11 hian Serchhip DC Conference Hall-ah briefing neih tur a ni dawn a, Bawrhsap chuan Mega Mock-Drill hi Sawrkar in a ngaih thutak zia sawiin Sawrkar hnathawkte leh hemi a tel tur zawng zawng te chuan an chanpual theuh ngaipawimawh tura a duh thu leh a titha duh lo an awm chuan an hotute hnena report a hreh dawn loh thu a sawi a ni.

National Disaster Management Authority  ruahman Mega Mock-Drill neih tur hi India ram hmarchhak huap a ni a, chhawng hnih ah then niin Chhawng khatna chu March ni 10, 2014 ah Itanagar leh Ziro (Arunachal Pradesh), Guwahati leh Jorhat (Assam), Shillong leh Tura (Meghalaya),  Gangtok leh Mangan (Sikkim) ah te neih ani ang a, a chhawng hnihna March ni 13. 2014 a neih turah Mizoram tel ve in Serchhip leh Aizawl ah buatsaih a ni ang a, hemi rual hian Silchar (Assam), Dimapur leh Kohima (Nagaland),  Imphal leh Thoubal (Manipur) bakah  Agartala leh Ambassa (Tripura) ah te neih a ni bawk ang.

India hmarchhak hi lirnghing hlauhawmna tehna ah khawvela hmun hlauhawm berte zing ami anih avangin Sawrkar laipuiin a ngai pawimawh em em a, Shillong-a kum 1897 a lirnghing 8.7 richter scale a na a nghing kha India rama lirnghing nasa berte zing ami niin mi 1500 laiin nunna an chan a, chhinchhiah theih chinah India hmarchhak ah kum 1897 atang khan Major Earthquake vawi 12 thleng tawhin  mihring 8,84,000 laiin lirnghing vangin nunna an chan tawh a ni.