MSU-in MISSTA lungawilohna lantir titawp turin sawrkarin hma la se duh

Mizo Student’s Union (MSU) General Headquarters chuan thuchhuah siamin zirlai naupangte’n kumtluan a an thawhrah seng tura an inbuatsaih mek laia, an final exam boruak tichhe thei leh rilru tiphawklek thei zawng a zirtirtu pawl MISSTA ten nawrh an huaihawt chu pawi an tih thu leh a rang thei ang bera sawrkar laka lungawilohna an tihlan chu a tawp theihnan Mizoram sawrkar pawhin an harsatna tawh hi chinfelsak thuai se a duh tih an sawi.

MSU chuan hunrei tak an harsatna te sawrkar hnena an lo thlen tawh chinfel sak an nih loh vanga MISSTA ten sawrkar laka lungawilohna an lantir hi MSU chuan âwm a tihpui hle tih an sawi a, amaherawhchu, kumtluana an kaihhruai zirlaite’n final exam an neih laia an zirlai naupangte harsatna zirtirtu te zawkin an siam chu MSU chuan hriatthiam harsa a ti takzet tih an sawi a, High School zirtirtu te’n harsatna an tawh hi MSU chuan a hrethiam a, chinfel a nih theihnan hma pawh nasa takin alo lakpui tawh ṭhin tih an sawi a, amah-erawhchu, tuna zirtirtu te’n sawrkar an ngenna hi zirlai naupang exam neih chhunga chinfel mai theih nia a lan chuan loh avangin zirlai naupang final exam neih chhung tal hi chu zaidawh taka lo nghak turin MSU chuan MISSTA hruaitute chu a ngen a ni.

MSU chuan Mizoram sawrkar pawh a hnathawkte harsatna hi chinfel theihdan a rang lama zawng turin MSU chuan a phut a, Service ṭhenkhat duhsakna pek laia ṭhenkhat hlamchhiah bik awm ṭhin chu tihbo a nih theihnan hma la turin a ngen bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram