Zirtawpni chawhnu dar 2 khan Serchhip District chhunga Polling Station 77 a hman tur Voter Verifiable Paper Audit Trail (VVPAT) chu venhimna khauh tak hnuaiah Serchhip rawn phurh thlen a ni a, Serchhip District Election Officer, District Bawrhsap leh Returning Officer, 28 Hrangturzo Assembly Bye-Election ni bawk Dr. Franklin Laltinkhuma’n a lo dawng a ni.
Heng khawlte hi venhimna uluk tak hnuaiah official ten an endik vek a, uluk taka chhinchhiah fel vek a nih hnuah Strong Room-ah dah fel nghal vek a ni.
VVPAT hi MLA inthlanah khan Aizawl District chhunga bial engemaw zatah chuan hman a lo ni tawh a, Mizoram hmun dangah chuan kan hman vawi khatna tur a ni. He khawl hi EVM khawl pangai nen thlun zawmin vote thlakatuin a vote thlak duhna ngeiah a thlak em tih lehkha hmanga hmanga lantir nghal thei khawl a ni a, inthlan result-ah rinhlelhna emaw complaint emaw a awm chuan he khawlin vote thlaktute vote thlak zawng zawng paper hmanga a lo print chhuah thlap hmangin awlsam leh rintlak takin a endik leh theih vek dawn a ni. He thil hi thil thar ni mahse EVM pangai tho hmanga vote thlak tur a nih avangin mipuite tan engmah hriatthiam loh tur a awm dawn lo a ni.